Bektenov India AI Impact Summit 2026 sammıtine qatysty
ASTANA. KAZINFORM – Oljas Bektenov Úndistan Premer-mınıstri Narendra Modımen kelissózder júrgizip, India AI Impact Summit 2026 sammıtine qatysty. Bul týraly Úkimettiń baspasóz qyzmeti habarlady.
Qazaqstan Respýblıkasy Prezıdentiniń tapsyrmasy boıynsha Premer-mınıstr Oljas Bektenov Nıý-Delıge jumys sapary aıasynda Úndistan Respýblıkasynyń Premer-mınıstri Narendra Modımen ekijaqty kezdesý ótkizip, India AI Impact Summit 2026 halyqaralyq sammıtine qatysty.
Oljas Bektenov Úndistan Premer-mınıstrine Qazaqstan Prezıdentiniń atynan jyly lebizderin jetkizdi. Óz kezeginde Narendra Modı Qasym-Jomart Toqaevqa izgi tilekterin joldady jáne strategııalyq áriptestikti jańa deńgeıge shyǵarý boıynsha birlesken jumysty jalǵastyrý nıetin bildirdi.
2025 jyldyń qorytyndysy boıynsha eki el arasyndaǵy taýar aınalymy $923,3 mln-dy qurady. Saýda jáne ınvestıtsııalar, energetıka, AÓK, tsıfrlandyrý jáne JI salasyndaǵy yntymaqtastyqty odan ári damytý máseleleri talqylandy. Qazaqstan Úndistan naryǵyna 40 taýarlyq pozıtsııa boıynsha $150 mln-ǵa ónim jetkizý kólemin ulǵaıtýǵa daıyn. Mańyzdy mıneraldar men sırek jer elementteri, ǵarysh, qorǵanys ónerkásibi salalaryndaǵy ózara is-qımyldy keńeıtýdiń eleýli áleýeti atap ótildi.
Premer-mınıstr álemniń 50-den astam elinen, sonyń ishinde memleket jáne úkimet basshylary, sondaı-aq IT salasyndaǵy sarapshylar men ǵylymı qaýymdastyq ókilderi jınalǵan India AI Impact Summit 2026 sammıtine qatysty.
Oljas Bektenov plenarlyq sessııada sóılegen sózinde ozyq tehnologııalardyń ekonomıkalyq áleýetine jáne olardyń jahandyq ósý qurylymyndaǵy áserine nazar aýdardy.
— Biz ıntellektiniń ınklıýzıvti, derbes jáne eń bastysy ekonomıkanyń negizgi sektorlaryn transformatsııalaıtyn kúshke ıe bolýy kerek ekenine senimdimiz. Búginde Qazaqstan óńirlik tsıfrlyq ortalyqqa aınalýda. Sondaı-aq BUU-nyń Elektrondyq úkimetti damytý ındeksinde 193 eldiń ishinde 24-shi orynda turmyz. Elimiz, sonymen qatar onlaın-qyzmetterdiń sapasy boıynsha álemdegi eń úzdik ondyqqa kiredi.
Prezıdent Qasym-Jomart Toqaev úsh jyl ishinde Qazaqstandy tolyq tsıfrlyq elge aınaldyrý maqsatyn qoıdy. Jasandy ıntellekt bizdiń ulttyq damýymyzdyń strategııalyq tiregi bolyp sanalady, — dep atap ótti Oljas Bektenov.
Qazaqstan Premer-mınıstri álemdik tehnologııalyq kompanııalardy ozyq tehnologııalardy damytý salasyndaǵy yntymaqtastyqqa shaqyrdy.
Memleket basshysy jarııalaǵan Tsıfrlandyrý jáne JI jyly aıasynda Qazaqstanda tsıfrlyq ekonomıkany damytý boıynsha jumystar júrgizilýde. Innovatsııany retteý men yntalandyrý arasyndaǵy tepe-teńdikti qamtamasyz etetin «Jasandy ıntellekt týraly» zań qabyldandy. Prezıdent janynan qurylǵan JI-di damytý jónindegi keńes bir platformada jetekshi álemdik vızıonerlerdi biriktirdi. Ortalyq Azııada alǵash ret eki iri sýperkompıýter klasteri ornalastyryldy, NVIDIA-men seriktestikte Derbes JI habyn qurý jobasy júzege asyrylýda.
Bıyl ázerbaıjandyq seriktestermen birlesip, Transkaspıı talshyqty-optıkalyq jelisiniń qurylysyn aıaqtaý jahandyq derekter trafıgi úshin eń qysqa balama marshrýtty qamtamasyz etedi, bul Qazaqstanǵa Shyǵys pen Batys arasyndaǵy tsıfrlyq kópir bolýǵa jol ashady.
Ekibastuz qalasynda júzege asyrylyp jatqan flagmandyq «DÓO-lar alqaby» jobasy da iri derekter ortalyqtary úshin ekojúıe qalyptastyrýǵa múmkindik beredi. Memleket ınfraqurylym, jobalardy súıemeldeý jáne taǵy da basqa qajetti qoldaýdyń barlyq túrin usynatyny atap ótildi.
Forým qorytyndysy boıynsha delegatsııa basshylary India AI Impact Expo 2026 halyqaralyq kórmesine bardy, onda jasandy ıntellekt salasyndaǵy praktıkalyq sheshimder, tehnologııalar jáne qoldanbaly ázirlemeler usynyldy. Ekspozıtsııa ónerkásip, qarjy, densaýlyq saqtaý, qaýipsizdik jáne taǵy da basqa salalardyń keń aýqymyn qamtydy.