Bektenov «Halyqtyq qurylys» baǵdarlamasynda otandyq ónimge basymdyq berýdi tapsyrdy

ASTANA. KAZINFORM – «Halyqtyq qurylys» baǵdarlamasy otandyq óndiristiń damýyna eleýli serpin beredi. Bul týraly Úkimet otyrysynda Premer-mınıstr Oljas Bektenov aıtty.

Oljas Bektenov
Foto: Úkimet

- «Halyqtyq qurylys» baǵdarlamasyn júzege asyrý ónerkásip salasy úshin qosymsha múmkindikterge jol ashyp, otandyq óndiristiń damýyna eleýli serpin beredi. Prezıdent bastamasyn júzege asyrýǵa Ulttyq qordan shamamen 6,5 trıllıon teńge baǵyttalady, - dedi ol.

Premer-mınıstrdiń aıtýynsha, elimizde qalyptasqan óndiristik baza bar.

- Búginde qazaqstandyq kásiporyndar negizgi qurylys materıaldary boıynsha ishki qajettiliktiń orta eseppen 73 paıyzǵa jýyǵyn qamtamasyz etip otyr. Endi osy qýattardy «Halyqtyq qurylys» baǵdarlamasynyń jobalaryna barynsha jumyldyryp, materıaldar men jabdyqtar óndirisin keńeıtý qajet bolatyn baǵyttardy aldyn ala aıqyndap alý kerek, - dedi Úkimet basshysy.

Oljas Bektenov energetıkalyq jáne kommýnaldyq sektorlardy jańǵyrtý ulttyq jobasy aıasynda jınaqtalǵan naqty tájirıbe bar ekenin aıtty.

- Oǵan sáıkes 106 jobalaý-smetalyq qujattama boıynsha materıaldar men jabdyqtarǵa degen qajettilik aıqyndaldy. Munda kásiporynnyń jańa ónimin uzaq merzimdi shart negizinde ótkizýge kepildik beretin ofteık-kelisimsharttar bekitý tetigin keńinen qoldaný qajet. Bul shyǵarylatyn ónim nomenklatýrasyn ulǵaıtýǵa, qazaqstandyq shıkizatty tereń óńdeýge, sondaı-aq quzyretterdi arttyryp, jańa tehnologııalardy ıgerýge múmkindik beredi. Osyndaı sharttardy júzege asyrý kezinde jobalardy júıeli túrde qoldaýǵa, otandyq jáne sheteldik ınvestorlarmen tikeleı ózara is-qımylǵa jaýapty «Báıterek» ınvestıtsııalyq holdınginiń qarjylyq quraldaryn paıdalaný qajet, - dedi Premer-mınıstr.

Buǵan deıin Úkimet basshysy qazbalar boıynsha jer qoınaýyn paıdalanýshylardyń otandyq kásiporyndardan taýar satyp alý kórsetkishi nebári 17 paıyz bolyp otyrǵanyn aıtqan edi.