Bektenov halyqty tegin dárimen qamtamasyz etý júıesine qatysty tapsyrma berdi
ASTANA. KAZINFORM — Dárilik zattar óndirisiniń tolyq tsıklin jolǵa qoıý strategııalyq mindetke aınalýǵa tıis. Bul týraly Úkimet otyrysynda Premer-mınıstr Oljas Bektenov málim etti.
— Ózderińizge málim, dárilik zattar men medıtsınalyq buıymdardyń aınalymy salasyndaǵy qadaǵalaý ókilettikteri kelesi jyldyń 1 qańtarynan bastap keńeıtiledi. Mınıstrlik osy ókilettikterdi iske asyrýǵa 100% daıyndyqty qamtamasyz etip, zań buzýdy jedel anyqtaý úshin ónimdi tańbalaý júıesin paıdalanýy qajet. Aqysyz dárimen qamtamasyz etý júıesine de erekshe nazar aýdaryńyzdar. Bul, birinshi kezekte, úzdiksiz em qabyldaýdy qajet etetin sozylmaly aýrýlary bar azamattar úshin asa mańyzdy, — dedi Oljas Bektenov.
Osy oraıda ol dárilik zattardy alýdyń túsinikti ári yńǵaıly tártibin qamtamasyz etý kerek ekenin tapsyrdy. Árbir emdelýshi qandaı dárilerdiń aqysyz beriletinin, olardy qaıdan jáne qashan alýǵa bolatynyn, qıyndyq týyndaǵan jaǵdaıda qaıda júginý kerektigin bilýge tıis.
— Sondaı-aq úırenshikti dárini basqa óndirýshiniń ónimine almastyrǵan jaǵdaıda, onyń sebepteri men qoldaný tártibin qarapaıym ári túsinikti tilde jetkizý qajet. Bul ásirese, uzaq ýaqyt nemese turaqty emdelýdi qajet etetin balalardyń ata-analary úshin mańyzdy. Aqparattyń az bolýy men ákimshilik rásimder aýyr naýqastar úshin kedergige aınalmaýǵa tıis. Densaýlyq saqtaý mınıstrligi osyny negizgi qaǵıda retinde basshylyqqa alsyn, — dedi Úkimet basshysy.
Buǵan deıin Otandyq dárilerdiń ishki naryqtaǵy úlesi 42%-ǵa jetti jazǵan edik.
