Bektenov Geologııalyq klaster quramynda zamanaýı zerthana qurylysyn 2026 jyly bastaýdy tapsyrdy
ASTANA. KAZINFORM — Kelesi jyldyń sońyna deıin geologııalyq tarıhı derekterdi tsıfrlandyrý jumystaryn aıaqtaý qajet. Búgin Úkimet otyrysynda Premer-mınıstr Oljas Bektenov beıindi vedomstvolarǵa osyndaı tapsyrma júktedi.
— Memleket basshysy halyqqa Joldaýynda geologııalyq barlaý jumystaryn kúsheıtýdi mańyzdy mindet retinde aıqyndady. Salanyń damýy elimizdiń ónerkásiptik negizin qalyptastyrýǵa yqpal etedi. Osy oraıda barlanǵan jer qoınaýynyń kólemin 2,2 mıllıon sharshy shaqyrymǵa deıin jetkizý úshin aýqymdy jumys júrgizilip jatyr. Bul mindet kelesi jyly oryndalatyn bolady. Jer qoınaýyn paıdalanýdyń biryńǵaı platformasy quryldy. Onda 22 memlekettik qyzmet kórsetiledi. Atalǵan platforma lıtsenzııalardy avtomatty túrde berýge jáne mindettemelerdiń oryndalýyna monıtorıng júrgizýge múmkindik beredi. Buryn dástúrli qaǵaz nusqada, magnıttik taspalarda jáne fotosýret túrinde saqtalǵan 3,5 mıllıonǵa jýyq bastapqy geologııalyq aqparat tsıfrlandyryldy, — dedi Úkimet basshysy.
Osy oraıda Premer-mınıstr Ónerkásip mınıstrligine Qarjy, Jasandy ıntellekt mınıstrlikterimen jáne Ulttyq geologııalyq qyzmetpen birlesip, kelesi jyldyń sońyna deıin tarıhı derekterdi tsıfrlandyrý jumystaryn aıaqtaýdy tapsyramyn.
— Bul, jalpy alǵanda Qazaqstan boıynsha tarıhı jáne jańa geologııalyq aqparatqa qol jetkizýdi ońaılatyp, ınvestıtsııalar tartý, ken oryndaryn barlaý men ıgerý jónindegi jobalardy iske asyrýdy jeńildetedi. Mamandardyń aıtýynsha, qazirgi qoldanystaǵy geologııalyq kartalar birshama eskirgen. Olar ken oryndarynyń áleýeti men naqty ornalasqan jerin dál anyqtaýǵa múmkindik bermeıdi. Sondyqtan geologııalyq kartalardyń aýqymyn keńeıtý jumystaryn jalǵastyrý qajet, — dedi ol.
Sondaı-aq Úkimet basshysy geologııalyq barlaý isine zamanaýı ǵylymı ádisterdi engizýge jaǵdaı jasaý kerektigin aıtty.
— Osy oraıda elordada Geologııalyq klaster quramynda zamanaýı zerthana qurý josparlanyp otyr. Ol mıneraldyq-geohımııalyq jáne taldamalyq zertteýler júrgizý úshin qajet. Ónerkásip mınıstrligi Qarjy mınıstrligimen jáne Ulttyq geologııalyq qyzmetpen birlesip, 2026 jyly atalǵan zerthana qurylysyn bastaýdy qamtamasyz etýi qajet, — dedi Oljas Bektenov.
Aıta keteıik, 2026-2028 jyldary elimizdiń 100 myń sharshy shaqyrym aýmaǵy zertteledi.