Bektenov eldegi eńbek qaýipsizdigin arttyrý úshin 3 naqty tapsyrma berdi
ASTANA. KAZINFORM – QR Premer-mınıstri Oljas Bektenov Úkimet otyrysynda elimizdegi eńbek qaýipsizdigin arttyrý maqsatynda naqty tapsyrmalar berdi.
— Qoldanystaǵy ádisterdiń tıimdiligi tómen bolyp otyr. Qarapaıym qaýipsizdik tehnıkasynyń talaptary eskerilmeı jatady. Eńbekti qorǵaý sharalaryn uıymdastyrýda biryńǵaı tásil, al aqparattyq júıelerde ózara baılanys joq. Sondyqtan bir ǵana Eńbek mınıstrliginiń kúsh-jigeri az bolady. Bul barlyq memlekettik organdardyń, ákimdikter men kásiporyndardyń birlesip atqaratyn aýqymdy jumysyna aınalýǵa tıis, - dedi Úkimet basshysy.
Sondaı-aq Bektenov eńbek salasyn tsıfrlandyrý boıynsha jaýapty vedomstvoǵa naqty sharalar qabyldaýdy tapsyrdy.
— Elimizdiń qaýipti óndiristik obektilerindegi jaraqat alý jaǵdaılaryn anyqtaý men esepke alý boıynsha aqparattyq júıelerdi ıntegratsııalaýdy osy jyldyń 1-shi qarashasyna deıin aıaqtaýdy tapsyramyn. Tsıfrlyq damý mınıstrligi memlekettik organdarmen birlesip, osy jyldyń 1-shi jeltoqsanyna deıin eńbekti qorǵaý salasyndaǵy birtutas tsıfrlyq ekojúıeni qurýdy qamtamasyz etsin, - dedi Premer-mınıstr.
Odan bólek eńbek qaýipsizdigin arttyrý sharalaryn kúsheıtý maqsatynda mynadaı 3 tapsyrma berdi:
- Birinshi, Eńbek mınıstrligi múddeli memlekettik organdarmen birlesip, osy jyldyń 1-shi qarashasyna deıin jumys berýshilerdiń óndiriste jaraqat alý faktilerin jasyrýyn boldyrmaý bóliginde zańnamalyq túzetýler ázirleýi qajet.
- Ekinshi, Ónerkásip mınıstrligi jumys berýshilermen birge jyl sońyna deıin ónerkásip oryndary men qurylys sektorynda óndiristik qaýipsizdikti jáne eńbekti qorǵaýǵa arnalǵan arnaıy jabdyqtardy mindetti túrde ornatýdy qamtamasyz etsin.
- Úshinshi, Tótenshe jaǵdaılar mınıstrligi osy jyldyń sońyna deıin kásiporyndarǵa ónerkásiptik qaýipsizdik normalaryna sáıkestigi turǵysynan tekserý júrgizsin,- dedi ol.
Tapsyrmalardyń oryndalýyn baqylaý Ermek Kósherbaevqa júkteledi.
Aıta keteıik, elimizde eńbek qaýipsizdigi mamandaryn daıarlaıtyn oqý ortalyǵy ashylady.