Ekonomıkany yryqtandyrý: Úkimet birqatar jańa tapsyrmalar berdi

Onda Memleket basshysy Qasym-Jomart Toqaevtyń ekonomıkany odan arǵy yryqtandyrý jáne básekelestikti damytý, onyń ishinde taýar jáne tsıfrlyq naryqtardaǵy kedergilerdi joıý, densaýlyq saqtaý, baılanys, elektr energetıkasy, tabıǵı monopolııalar qyzmetteri salasyndaǵy retteýdi jetildirý boıynsha qoıǵan mindetterin júzege asyrý máselesine erekshe nazar aýdaryldy.

Komıssııa Memleket basshysynyń «Ekonomıkany yryqtandyrý jónindegi sharalar týraly» Jarlyǵynyń oryndalý barysyn qarady. Basym baǵyttardyń biri — dári-dármekterdi naryqqa shyǵarý merzimin 3-5 jyldan 100 jumys kúnine deıin qysqartý. Densaýlyq saqtaý mınıstrligi preparattardy tirkeý men saraptamadan ótkizýdiń negizgi kezeńderin biriktiretin «biryńǵaı tereze» qaǵıdaty boıynsha kompozıttik memlekettik qyzmetti engizýde. Halyqtyń ınnovatsııalyq medıtsınaǵa keń aýqymda qol jetkizýin jáne tehnologııalar transfertin qamtamasyz etý maqsatynda Komıssııa túpkilikti tsıfrlandyrý júrgizý jáne satyp alýdyń barlyq negizgi tizbelerine dárilik zattar men medıtsınalyq buıymdardy qatar engizý máselesin qarady.

Derekterdi Sáıkestendirý kodtarynyń bazasyna engizý úshin qajetti mobıldi qurylǵylardy verıfıkatsııalaý máselesine de nazar aýdaryldy. Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev «Telekommýnıkatsııalar naryǵyn jáne derekterdi óńdeý ortalyqtaryn damytý týraly» zań jobasy sheńberinde júrgizilip jatqan ınstıtýtsıonaldy jumystar týraly baıandady. Verıfıkatsııa rásimin zańnama arqyly naqty bekitý tirkeý júıesiniń ornyqtylyǵyn jáne tsıfrlyq ınfraqurylymnyń turaqty jumys isteýin qamtamasyz etedi.

Odan bólek elektrondyq qujat aınalymy júıeleri naryǵyn damytý jáne tsıfrlyq sektorda básekelestik ortany qalyptastyrý boıynsha da atqarylyp jatqan jumystar týraly habarlandy.

Investıtsııa tartý, jańa qýattardy iske qosý jáne tarıftik júktemeni teńestirý úshin engizilgen Elektr energııasyn biryńǵaı satyp alýshynyń jumysyna qatysty suraqtar, sondaı-aq temirjoldaǵy kireberis joldar salasyndaǵy problemalyq máselelerdi joıý jaıy talqylandy.

Ekonomıkany yryqtandyrý sharalary boıynsha Premer-mınıstrdiń birinshi orynbasary Roman Sklıar, Premer-mınıstrdiń orynbasary — ulttyq ekonomıka mınıstri Serik Jumanǵarın, energetıka mınıstri energetan Aqkenjenov, ónerkásip jáne qurylys mınıstri Ersaıyn Naǵaspaev, «Samuryq-Qazyna» UÁQ» AQ basqarma tóraǵasy Nurlan Jaqypov jáne basqa da qatysýshylar pikir bildirdi.

Otyrys qorytyndysy boıynsha Premer-mınıstr Oljas Bektenov memlekettik organdar men vedomstvolarǵa birqatar tapsyrma berdi:

• Qarjy mınıstrligi: múddeli memlekettik organdarmen birlesip, sondaı-aq Qordyń enshiles (táýeldi) kompanııalary men holdıngterin eskerip, ony merzimdi ózektendirý jónindegi normatıvtik talapty belgileı otyryp, Memlekettik múlik tizilimin jańartsyn.

• Ulttyq ekonomıka mınıstrligi: BQDA jáne memlekettik organdarmen birlese otyryp, monopolııalyq naryqtardy qospaǵanda, baǵalar men tarıfterdi qalyptastyrý erkindigin shekteıtin normalardy alyp tastaý jóninde usynystar engizsin; jekeshelendirý obektileri boıynsha ınvestıtsııalyq tartymdylyǵyn arttyrý maqsatynda Jol kartalaryn bekitsin; Energetıka mınıstrligimen birlesip, yryqtandyrý týraly Jarlyqty eskere otyryp, elektr energııasy men kommýnaldyq qyzmetterge qaıtalama sýbsıdııalaýdyń kúshin joıý merzimderin sınhrondaý.

• Densaýlyq saqtaý mınıstrligi: Biryńǵaı dıstrıbıýtordiń satyp alý tizimine jáne ambýlatorııalyq dári-dármekpen qamtamasyz etý júıesine dári-dármekter men medıtsınalyq buıymdardy engizý protsesterin tsıfrlandyrýdy jedeldetý.

• Jasandy ıntellekt jáne tsıfrlyq damý mınıstrligi: mobıldi qurylǵylardy verıfıkatsııalaý boıynsha zańnamalyq ózgerister qabyldasyn. BQDA-men birlesip, elektrondyq qujat aınalymyna qatysýshylardy irikteý rásimderin jetildirý jumystaryn jalǵastyrsyn.

• Ulttyq ekonomıka mınıstrligi: tabıǵı monopolııa sýbektilerin derbes aıqyndaý úshin zańnamalyq túzetýler qabyldasyn.

• «Samuryq-Qazyna» UÁQ» AQ BQDA-men birlesip, qordy satyp alý sheńberinde tásilderdi jetildirý jumystaryn ári qaraı jalǵastyrsyn. 

Aıta ketelik Úkimet Konstıtýtsııany ilgeriletý jónindegi is-sharalar josparyn bekitken edi.