Bektenov: Egis alqaby bekitilgen kesteden 1 gektar artyq egilse, onda oǵan 1 tamshy da sý bermeımiz
ASTANA. KAZINFORM — Oblys ákimderi 2026 jylǵy vegetatsııalyq maýsymǵa daıyndyq aıasynda kommýnaldyq menshiktegi gıdrotehnıkalyq nysandar men ırrıgatsııalyq kanaldarǵa jóndeý jumystaryn júrgizýi kerek. Bul týraly Úkimet otyrysynda Premer-mınıstr Oljas Bektenov aıtty.
— Sý tapshylyǵy jaǵdaıynda sýmen qamtamasyz etý máselelerin sheshý úshin keshendi sharalardy iske asyrýymyz qajet. Oblys ákimderi 2026 jylǵy vegetatsııalyq maýsymǵa daıyndyq aıasynda kommýnaldyq menshiktegi gıdrotehnıkalyq nysandar men ırrıgatsııalyq kanaldarǵa jóndeý jumystaryn júrgizýi kerek. Basty mindet — sýdy kóp qajet etetin daqyldardyń úlesin qysqartý jáne sý únemdeý tehnologııalaryn engizý. Óńir ákimdikteri men ýákiletti memlekettik organdar egis alqaptarynyń qurylysyn ártaraptandyrý boıynsha ındıkatorlardyń múltiksiz oryndalýyn qamtamasyz etsin, — dedi Úkimet basshysy.
Premer-mınıstr Sý resýrstary mınıstrligine bekitilgen lımıtterden tym kóp sý berý jaǵdaılarynyń aldyn alýdy tapsyrdy.
— Bul óte ózekti másele. Men qaıtalap aıtamyn. Aýyl sharýashylyǵy mınıstrligi egis alqaptaryn ártaraptandyrý jóninde tıisti keste bekitti. Aldaǵy ýaqytta barlyq jumys osy kestege sáıkes júrgizilýi tıis. Mysaly, bir sharýashylyqta biz 100 gektar bolý kerek desek, erteń 1 gektar artyq egilse, biz oǵan bir tamshy sý bermeımiz. Eger erteń Aýyl sharýashylyǵy mınıstrligi bekitken kórsetkishterdi buzyp, dıqandardyń shyǵyndary bolsa, bir tıyny da bıýdjetten ótelmeıdi. Buny halyqqa ashyq, úzildi-kesildi aıtý kerek. 2026 jyldyń shildesinde Shardara toptyq sý qubyrynyń qurylysy aıaqtalady. Bul qala turǵyndaryn aýyz sýmen úzdiksiz qamtamasyz etýge múmkindik beredi. Atalǵan máseleni men ózim jeke baqylaýymda ustap otyrmyn. Sý resýrstary jáne ırrıgatsııa mınıstrligi, sondaı-aq shekara mańyndaǵy óńirlerdiń ákimdikteri qajetti sý kólemin der kezinde kelýin qamtamasyz etý úshin kórshiles memlekettermen tyǵyz jumys júrgizýi qajet, — dedi Oljas Bektenov.
Aıta keteıik, ı otyrysta Qanat Bozymbaev ońtústik aımaqtarda aldaǵy vegetatsııa kezeńinde sý tapshy bolatynyn eskertip, Sý resýrstary mınıstrligi sýdyń «qara naryǵyn» joıý is-sharalary josparyn ázirleýi tıistigin atap ótken edi.