Bektenov CNPC kompanııasynyń basshysy Daımen energetıka salasyndaǵy jobalardy talqylady
ATYRAÝ. KAZINFORM – Premer-Mınıstr Oljas Bektenov Qytaı Halyq Respýblıkasy Tóraǵasynyń memlekettik sapary aıasynda Qazaqstanǵa kelgen China National Petroleum Corporation (CNPC) Dırektorlar keńesiniń tóraǵasy Daı Hoýlıanmen kezdesý ótkizdi.
Energetıka salasyndaǵy ınvestıtsııalyq yntymaqtastyqty tereńdetý máseleleri qaraldy. Shymkent munaı óńdeý zaýytynyń óndiristik qýatyn arttyrý jónindegi birlesken jobaǵa erekshe nazar aýdaryldy. Kezdesýge qatysýshylar jobanyń aǵymdaǵy kezeńin talqylap, nysandy ýaqtyly paıdalanýǵa berý úshin jańǵyrtý qarqynyn jedeldetý nıetin rastady.
Shymkent MÓZ-in keńeıtýdi eskere otyryp, zaýytty shıkizattyń jetkilikti kólemimen qamtamasyz etý jáne Keńqııaq – Atyraý, Keńqııaq – Qumkól munaı qubyrlaryn keńeıtý sharalary qaraldy. Qazirgi ýaqytta qazaqstandyq jáne qytaılyq sarapshylar qajetti esepter júrgizýde.
Kezdesý barysynda Oljas Bektenov pen Daı Hoýlıan «Beıneý – Bozoı – Shymkent» gaz qubyrynyń birinshi jelisin salý jáne iske qosý boıynsha tabysty júzege asyrylǵan birlesken jobany mysalǵa ala otyryp, gaz salasyndaǵy yntymaqtastyqty odan ári arttyrý perspektıvalaryna toqtaldy.
Úkimet basshysy birlesken kásiporyndar tabysty ári ekonomıkalyq jaǵynan tıimdi ekenin aıtty. Sonymen qatar Premer-Mınıstr jergilikti taýar óndirýshilermen jáne qyzmet kórsetýshilermen tyǵyz ózara is-qımyl jasaý arqyly jergilikti qamtý úlesin kezeń-kezeńimen ulǵaıtýdyń mańyzdylyǵyn atap ótti.
«Qazaqstan da kóptegen elder sekildi, eldiń energetıkalyq qaýipsizdigin qamtamasyz etý boıynsha strategııalyq mindet qoıyp otyr. Eń aldymen, bul – munaı óńdeý qýattaryn qurý jáne jańǵyrtý. Biz Shymkent munaı óńdeý zaýytynyń óndiristik qýatyn arttyrýǵa erekshe kóńil bólemiz. Bizdiń barlyq jobalarymyzdy iske asyrýdaǵy basymdyqtardyń biri – jergilikti qamtý máseleleri. Eger elimizde qajetti taýarlar nemese jabdyqtar óndirilmese, onda olardy jaqyn arada Qazaqstan aýmaǵynda lokalızatsııalaý máselesin birlesip pysyqtaýdy usynamyz», - dedi Oljas Bektenov Úkimettiń birlesken josparlardy iske asyrýda ashyq ári syndarly dıalogqa daıyn ekenin rastaı otyryp.
Anyqtama: Qytaı ulttyq munaı-gaz korporatsııasy (CNPC) álemdegi eń iri TOP-3 munaı kompanııasynyń qataryna kiredi. Qazaqstannyń munaı-gaz ónerkásibine $45 mlrd astam qarajat salynǵan. El boıynsha CNPC kásiporyndarynda 30 myńnan astam adam eńbek etedi, olardyń 98,3%-y – qazaqstandyqtar.
