Bektenov aýyldaǵy turǵyn úı qurylysynda MJÁ tetiginiń qoldanylmaý sebebin atady
ASTANA. KAZINFORM — Jyl basynan «Dıplommen aýylǵa» baǵdarlamasy aıasynda 27,5 mlrd teńge somasynda 3 250 kredıt berildi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Búgingi tańda aýyldyq jerlerge jumys isteý úshin keletin mamandardy qoldaý «Dıplommen aýylǵa» baǵdarlamasy aıasynda júzege asyrylýda. Onyń operatory — Otbasy banki. Osy baǵdarlama arqyly turǵyn úı satyp alýǵa nemese salýǵa bıýdjettik kredıt berý kózdeledi. Baǵdarlamaǵa densaýlyq saqtaý, bilim berý, áleýmettik qamsyzdandyrý, mádenıet, sport, agroónerkásiptik keshen salasyndaǵy qajetti mamandyqtar tizbesine sáıkes mamandar, aýyldar, kentter, aýyldyq okrýgter ákimderi apparattarynyń memlekettik qyzmetshileri qatysady. Basty shart — mamandar kredıt alǵan kezde aýyldyq eldi mekende ornalasqan uıymda tıisti mamandyq boıynsha keminde 3 jyl jumys isteý mindettemesin alýy, — dedi Úkimet basshysy.
Onyń málimetinshe, 2025 jylǵy 1 qańtardan bastap 2026 jylǵy 26 aqpan aralyǵynda «Dıplommen aýylǵa» baǵdarlamasy aıasynda 27,5 mlrd teńge somasynda 3 250 kredıt berildi.
— Jeke ınvestıtsııa tartý bóliginde buǵan deıin keıbir óńirlerde turǵyn úı salý boıynsha memlekettik-jekeshelik áriptestik tetikteri pysyqtalǵanyn atap ótken jón. Alaıda praktıkada qurylys salýshylar úshin ózindik qunynyń joǵary bolýyna baılanysty mundaı jobalar tıimdi emes. Osyǵan baılanysty aýyldaǵy turǵyn úı qurylysy segmentinde MJÁ tetigi qoldanylmaıdy, — dedi Oljas Bektenov.
Buǵan deıin Premer-mınıstrdiń orynbasary Qanat Bozymbaev «Dıplommen aýylǵa» baǵdarlamasymen barǵandardyń 95 paıyzy aýyldarda qalyp jatqanyn aıtqan edi.
