Bektenov: Astyq tasymaldaý shyǵystaryn qosymsha qarjylandyrý máselesin sheshý qajet
ASTANA. KAZINFORM — Búgin Úkimet otyrysynda Premer-mınıstr Oljas Bektenov astyq tasymaldaý shyǵystaryn qosymsha qarjylandyrý máselesin sheshýdi tapsyrdy.
— Sharýalarǵa qarjylyq júktemeni azaıtý maqsatynda Qarjy jáne Aýyl sharýashylyǵy mınıstrlikteri astyq tasymaldaýǵa baılanysty shyǵystardy qosymsha qarjylandyrý máselesin sheshýi qajet. Mal jáne ósimdik sharýashylyǵy salalary boıynsha qaryzdarǵa kepildik berý quralyn iske asyrý úshin Aýyl sharýashylyǵy, Qarjy, Ulttyq ekonomıka mınıstrlikterine jáne «Báıterek» holdıngine qajetti qarajat kózderin qarastyrýdy tapsyramyn, — dedi Úkimet basshysy.
Premer-mınıstrdiń aıtýynsha, qarjy resýrstarynyń qoljetimdiligin keńeıtý turǵysynda áleýmettik-kásipkerlik korporatsııalarǵa ınvestıtsııalyq maqsattar men aınalym qarajatyn satyp alý úshin agroónerkásip keshen sýbektilerin qarjylandyrýǵa múmkindik berý kerek.
— Osyǵan baılanysty Aýyl sharýashylyǵy, Ulttyq ekonomıka mınıstrlikteri básekelestikti qorǵaý jáne damytý agenttigimen birlesip, eki apta ishinde Úkimet qaýlysyna tıisti ózgerister engizsin, — dedi Oljas Bektenov.
Buǵan deıin Úkimet basshysy mal sharýashylyǵynda ónimdilikti ulǵaıtýdy tapsyrǵanyn jazǵan edik.
