Bektenov áleýmettik qoldaýdyń jańa júıesi týraly: aýqatty adamdar óz kúshine súıenýi tıis
ASTANA. KAZINFORM — Qazaqstanda 2027 jylǵy 1 qańtardan bastap ataýly áleýmettik qoldaýdyń jańa júıesi tolyq kólemde iske qosylady.
Bul týraly búgin Quryltaıdyń jalpy otyrysynda Premer-mınıstr Oljas Bektenov aıtty.
— Bıýdjettiń shyǵys bóligine toqtalsaq, memlekettik shyǵystardy ońtaılandyrý jumystary jalǵasyp keledi. Ózderińizge belgili, Memleket basshysynyń tapsyrmasy aıasynda memlekettik organdarǵa arnalǵan ákimshilik ǵımarattardy salýǵa moratorıı jarııalandy. Bul baǵytta aıtarlyqtaı qomaqty qarjyny qysqartýǵa múmkin boldy. Sonymen qatar, basqa da aýqymdy sharalar da qolǵa alyndy. Máselen, bıýdjetke túzetýler engizý arqyly 2026 jylǵa josparlanǵan shyǵystardy 360 mlrd teńgege qysqartyp, bosaǵan qarajatty basymdyǵy joǵary basqa maqsattarǵa qaıta baǵyttadyq. Aldaǵy kezeńge arnalǵan bıýdjetti ázirleý barysynda jalpy somasy 36,9 trln teńge bolatyn qarjylandyrýǵa ótinimder túskenimen, 2027 jylǵa bekitilgen shyǵys kólemi 30,2 trln teńge boldy. Bul rette bıýdjetti qaraý kezinde shyǵys bóligin 6,7 trln teńgege qysqarttyq, — dedi Oljas Bektenov.
Onyń aıtýynsha, bıýdjet shyǵystaryn qysqartý baǵytynda áleýmettik saladaǵy shyǵyndar nazarǵa alynǵan.
— Qazirgi ýaqytta biz áleýmettik saladaǵy qamtamasyz etý baǵytynda iri reformany júzege asyryp jatyrmyz. Bul rette, adamnyń sanatyna negizdelgen júıeden qajettilikke arnalǵan júıege kóshemiz. Bul qaǵıda kelesi jyldyń 1 qańtarynan bastap tolyqtaı jumys isteıdi jáne qazirgi ýaqytta osyny keńinen túsindirip jatyrmyz. Máselen, búginde aýqatty nemese tabysy az kópbalaly otbasylar memleketten birdeı qoldaý sharalaryn alyp keledi. Bizdińshe, mundaı qaǵıda ádiletsiz. Ózderin qamtamasyz ete alatyn aýqatty, dáýletti adamdar memlekettik kómek almaýy tıis, olar óz resýrstaryna súıenýi kerek, — dedi Úkimet basshysy.
Osy oraıda ol memleket qazirgi jaǵdaıyna baılanysty óz-ózin qamtamasyz ete almaıtyn jandarǵa ǵana qoldaý kórsetýi tıis ekenin aıtty. Degenmen, memlekettik kómekti alatyn adam osyny kúnkóris kózi retinde qabyldamaýy kerek. Kerisinshe, bul kómek atalǵan otbasylarǵa muqtaj jandar sanatynan shyǵýǵa septigin tıgizetin demeýshi qural retinde qarastyrylady.
Úkimet basshysynyń sózine qaraǵanda, jańa júıe qomaqty bıýdjet qarajatyn únemdep, olardy mańyzdyraq maqsattarǵa baǵyttaýǵa múmkindik beredi. Tek 2027 jyldyń ózinde bul soma 700 mlrd teńge, al úsh jyldyq kezeńde 2,5 trln teńgege jýyq bolady.
Buǵan deıin keler jyly Qazaqstan ekonomıkasy qanshalyqty ósýi múmkin ekenin jazǵan edik.
