Bektenov Alataý qalasynda ınvestıtsııalyq jobalardy iske asyrý keleshegin talqylady
ASTANA. KAZINFORM — Oljas Bektenov CAMCE kompanııasynyń basshysy Lı Haısınmen kezdesip, Alataý qalasynda ınvestıtsııalyq jobalardy iske asyrý keleshegi týraly aıtty, dep habarlaıdy Úkimettiń baspasóz qyzmeti.
Memleket basshysynyń elimizdiń ekonomıkasyna ınvestıtsııalar tartý jónindegi jumysty kúsheıtý týraly tapsyrmasyn oryndaý sheńberinde Úkimet qalyptasqan máselelerdi jedel sheshý jáne ınvestıtsııalyq jobalardy ýaqtyly iske qosý úshin bıznes ókilderimen ózara is-qımyldy nyǵaıtty.
Búgin Premer-mınıstr Oljas Bektenov qytaılyq China CAMC Engineering Co., Ltd. (CAMCE) kompanııasynyń prezıdenti Lı Haısınmen kezdesý ótkizdi.
China CAMC Engineering Co., Ltd. — 60-tan astam elde ınfraqurylymdy, ónerkásipti jáne energetıkany damytý salalarynda keshendi EPC-jobalardy iske asyratyn jáne Qytaıdyń Sinomach Group (China National Machinery Industry Corporation) mashına jasaý jónindegi iri memlekettik konglomeratynyń quramyna kiretin jetekshi halyqaralyq ınjınırıngtik kompanııa.
Kompanııa prezıdenti Lı Haısın Alataý qalasynyń kólik-logıstıkalyq jáne ındýstrııalyq ınfraqurylymyn damytý salasyndaǵy ınvestıtsııalyq yntymaqtastyqtyń perspektıvalary týraly birqatar usynystardy aıtty. «Orta dálizdi» damytý aıasyndaǵy yntymaqtastyqqa nazar aýdaryldy.
— Úkimet jumysynyń basym baǵyttarynyń biri — barynsha qolaıly ınvestıtsııalyq ahýal qalyptastyrý. Bul naqty ekonomıkaǵa tikeleı sheteldik ınvestıtsııalardy tartýǵa jáne elimiz úshin mańyzdy jobalardy iske asyrýdy qamtamasyz etýge, jańa jumys oryndaryn ashýǵa múmkindik beredi. Sońǵy alty jylda elimizge tartylǵan tikeleı sheteldik ınvestıtsııalar kólemi shamamen $130 mlrd-ty qurady. Bul rette Memleket basshysynyń shıkizattyq emes salalardyń tartymdylyǵyn arttyrý boıynsha bastamashylyq jasaǵan sharalary nátıje berýde — shıkizattyq emes sektorǵa sheteldik ınvestıtsııalar $72,7 mlrd-ty qurady, ıaǵnı sheteldik áriptester qaıta óńdeý ónerkásibi salalaryna kóbirek ınvestıtsııa sala bastady, — dep atap ótti Oljas Bektenov.
Kezdesý qorytyndysy boıynsha tıisti memlekettik organdarǵa ınvestıtsııalyq usynysty egjeı-tegjeıli pysyqtaý tapsyryldy.
Osydan buryn Oljas Bektenov Ekonomıkalyq saıasat jónindegi keńes otyrysyn ótkizgenin jazdyq.