Bektenov: Taǵy 525 mlrd teńgeden asa qarajat memleket paıdasyna aýdaryldy
ASTANA. KAZINFORM — Qazaqstan Respýblıkasynyń Premer-mınıstri Oljas Bektenovtiń tóraǵalyǵymen Aktıvterdi qaıtarý máseleleri jónindegi komıssııanyń kezekti otyrysy ótti, dep habarlaıdy Úkimettiń baspasóz qyzmeti.
Komıssııa «Zańsyz ıemdenilgen aktıvterdi memleketke qaıtarý týraly» Zań sýbektileriniń jalpy somasy 525 mlrd teńgeden astam qarajatty memleket paıdasyna aýdarý jáne áleýmettik jobalardy júzege asyrý jónindegi kelisimderin maquldady. Qarajatty Arnaýly memlekettik qorǵa aýdarýmen qatar, Zań sýbektileri esebinen kelesi obektilerdiń qurylysy maquldandy: Arqalyq qalasynda daryndy sportshy balalarǵa arnalǵan 120 oryndyq sporttyq keshen, Astanada tirek-qımyl apparaty buzylǵan balalarǵa arnalǵan ońaltý ortalyǵy, Almatyda erekshe qajettiligi bar adamdarǵa arnalǵan 400 oryndyq jattyǵý ortalyǵy.
«Memleket basshysy atap ótkendeı, qaıtarylǵan barlyq qarajat qazaqstandyqtardyń ıgiligi úshin jumys isteýi tıis. Bıylǵy jyldyń basynan bastap Komıssııa qaıtarylǵan aktıvter boıynsha jalpy somasy 900 mlrd teńgeden astam kelisimderdi maquldady. Bul qarajatqa birqatar áleýmettik ınfraqurylym obektileriniń qurylysy bastaldy», — dep atap ótti Oljas Bektenov.
Buǵan deıin, Prezıdent tapsyrmasy boıynsha Arnaýly memlekettik qordan Aqmola oblysyndaǵy Zerendi aýylynda sporttyq keshen jáne Túrkistan oblysyndaǵy Temirlan aýylynda mýzyka mektebiniń qurylysyna qarajat bólindi. Komıssııa jumysy jalǵasýda.
Eske salsaq, Oljas Bektenov Shanhaıda ótken VII Qytaı halyqaralyq ımport kórmesiniń ashylýyna qatysty.
