Bektenov aqparattyq júıelerdi Tier-III deńgeıindegi derekterdi óńdeý ortalyǵyna kóshirýdi tapsyrdy
ASTANA. KAZINFORM – Búgin Úkimet otyrysynda Premer-mınıstr Oljas Bektenov aqparattyq júıelerdi memlekettik Tier-III deńgeıindegi derekterdi óńdeý ortalyǵyna kóshirýdi tapsyrdy
- Aqparattyq júıelerdiń senimdiligin arttyrý maqsatynda memlekettik Tier-III deńgeıindegi derekterdi óńdeý ortalyǵy jumys isteıdi. Jasandy ıntellekt mınıstrligi múddeli memlekettik organdarmen birlesip, 1-jartyjyldyqtyń sońyna deıin aqparattyq júıelerdi jańa derekterdi óńdeý ortalyǵyna kóshirýdi aıaqtaýy qajet. Bul bizdiń azamattarymyzdyń derekterin qorǵaý deńgeıin arttyrýǵa múmkindik beredi. Memleket basshysy suhbatta atap kórsetken tásilderdi eskere otyryp, ekonomıkanyń jańa tehnologııalyq modeline kóshý turaqty jáne senimdi energetıkalyq bazanyń bolýymen tikeleı baılanysty ekenin túsiný qajet, - dedi Oljas Bektenov.
Onyń aıtýynsha, joǵary ónimdi esepteýler, derekterdi óńdeý ortalyqtary, avtomattandyrylǵan jáne robottandyrylǵan óndiristerdiń damýy obektıvti túrde energııany tutyný kóleminiń eselep ósýimen qatar júredi. Ol úshin generatsııa men jelilik ınfraqurylymdy qarqyndy damytý qajet.
- Energetıka mınıstrligine Jasandy ıntellekt, Ulttyq ekonomıka jáne Ónerkásip mınıstrlikterimen birge tsıfrlyq ınfraqurylym men ónerkásip salasyndaǵy jobalardy júzege asyrýdy eskere otyryp, elektr energııasynyń óndirisi men tutynýdyń uzaq merzimdi balansyn jańartýdy qamtamasyz etýdi tapsyramyn, - dedi Úkimet basshysy.
Aıta keteıik, Qazaqstan halqyn Jańa jylmen quttyqtaǵan Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalaǵan edi.
