Bektenov: Aqmola oblysyndaǵy sý tasqynyna qarsy sharalar tıimsizdigin kórsetti

ASTANA. KAZINFORM — Úkimet basshysy Oljas Bektenov Aqmola oblysyndaǵy sý tasqynyna qarsy sharalar óz tıimsizdigin kórsetkenin aıtyp, óńirde qaýipsizdik josparyn qaıta qaraýdy tapsyrdy. 

— Jalpy respýblıka boıynsha sý tasqyny kezeńi birqalypty ótip jatyr. Deıturǵanmen, Aqmola oblysynda sáýir aıynyń basynda kúrdeli jaǵdaı qalyptasty. 100-den astam úı-jaıdy sý shaıyp ketti. Qazir ahýal turaqtaldy, qaýip seıildi deýge bolady. Tosyn jaǵdaı eldi mekenderdi qorǵaý boıynsha ınjenerlik jumystardyń durys júrgizilmeýinen bolǵan. Sý tasqynyna qarsy sharalardy oryndaý men josparlaýdyń sapasyz bolǵany kórinip tur. Máselen Eski Qalqutan aýylynda Qalqutan ózenin tazartý, jaǵalaýyn bekitý jáne tereńdetý jumystary 3 shaqyrymdaı ǵana ýchaskede júrgizilgen. Joba boıynsha 11 shaqyrym bekitilgen. Osynyń saldarynan ózen arnasynan asyp, úılerdi sý basyp qaldy, — dedi ol.

Sondaı-aq Oljas Bektenov bul sý deńgeıiniń úlken kólemde emestigin, oǵan tosqaýyl qoıýǵa bolatynyn atap ótti.

— Makınsk qalasyna da sý jaıyldy. Jergilikti bılik qajetti sharalardy ýaqtyly qabyldamaǵan. Óńirde dál osy eldi mekenderdi jyl saıyn sý basady, demek Aqmola oblysyndaǵy qabyldanyp jatqan sharalar tıimsiz, — dep túıdi sózin ol.

Úkimet basshysy Marat Ahmetjanovqa jospardy qaıta qarap, barlyq qajetti jumysty iske asyrýdy, baspanasy sýda qalǵandar turǵyndarǵa kómek kórsetýdi tapsyrdy.

Aıta ketelik Aqmolanyń Eski Qalqutan aýylynda kólik qatynasy úzilgeni týraly jazǵan edik.