Bektenov: Abaı jáne Pavlodar oblysyndaǵy órt kezinde memorgandardyń is-qımyl algorıtmi saqtalmaǵan

ASTANA. KAZINFORM – QR Premer-mınıstri Oljas Bektenov Pavlodar jáne Abaı oblysynda bolǵan tabıǵı órt kezinde memlekettik organdardyń is-qımyl algorıtmi saqtalmaǵanyn synǵa aldy.

— Órt sóndirý kezinde shuǵyl áreket etip, tıisti kúshterdi jumyldyrý úshin jańadan memlekettik organdardyń is-qımyl algorıtmi ázirlengen bolatyn. Alaıda bıyl Pavlodar jáne Abaı oblystarynda bolǵan tabıǵı órt bul algorıtmniń oryndalmaı otyrǵanyn kórsetti. Mysaly, Abaı oblysynda orman sharýashylyǵy memlekettik mekemesiniń qyzmetkerleri Tótenshe jaǵdaılar, Іshki ister jáne Qorǵanys mınıstrlikterine órttiń shyqqany týraly tez arada habar bermegen. Pavlodar oblysynda da dál osyndaı jaǵdaı oryn aldy, — dedi ol Úkimet otyrysynda. 

Sondaı-aq Oljas Bektenov bul keleńsizdikke jaýaptylardy tez arada anyqtap, tıisti shara qoldanýdy tapsyrdy. 

— Ekologııa, Tótenshe jaǵdaılar jáne Іshki ister mınıstrlikterine osy eki óńirdegi órttiń shyǵý sebepterin tekserip, tıisti sharalar qabyldaýdy jáne kinálilerdi anyqtap, jaýapkershilikke tartýdy tapsyramyn, — dep túıdi sózin Premer-mınıstr.