Bektas Beknazarov EQYU DIAQB ókilimen dinı erkindik máselelerin talqylady
K. Manochanyń sapary Ortalyq Azııa aımaǵyndaǵy dinı erkindik pen senimdi ilgeriletý arqyly qaýipsizdik pen áleýmettik toptasýǵa járdemdesý jónindegi DIAQB jobasyn iske asyrýǵa baılanysty bolyp otyr.
Meımanmen kezdesýde B.Beknazarov bul jobanyń erekshe mańyzyn atap ótip, bizdiń elimizde qalyptasqan ultaralyq jáne dinı konfessııalar arasyndaǵy kelisim úlgisi týraly habardar etti. Senat tóraǵasynyń orynbasary: «Toleranttylyq pen kemsitpeýshilikter qaǵıdattary kóp ultty Qazaqstan úshin asa mańyzdy», - dep atap ótti.
B. Beknazarov Prezıdent Nursultan Nazarbaevtyń Álemdik jáne dástúrli dinder lıderleriniń Sezin shaqyrý týraly bastamasy qarqyndy iske asyp kele jatqany týraly aıtyp berdi. Oǵan túrli din ókilderi ǵana emes, álemdik aýqymdaǵy saıası qaıratkerler, bedeldi halyqaralyq uıymdardyń, memleketter men úkimetterdiń basshylary bas qosyp keledi.
K. Manocha óz kezeginde álemdik dinder jetekshileriniń forýmyna qatysa otyryp, Qazaqstan basshylyǵynyń toleranttyq pen túrli dinderdiń ózara túsinistigin ilgeriletýden aınymaıtynyna kózi jetkenin aıtty.
EQYU DIAQB ókili ulttyq, til men konfessııalyq alýandyqty saqtaý jónindegi Qazaqstan júrgizip kele jatqan saıasatqa zor yqylas bildirdi. Áńgime barysynda 2011 jyly qabyldanǵan «Dinı qyzmet jáne dinı birlestikter týraly» zańdy iske asyrýdyń jekelegen máseleleri, sondaı-aq taıaýda qurylǵan Din isteri jáne azamattyq qoǵam mınıstrliginiń qyzmeti talqylandy.
«Biz dinder erkindigi men dinı senim bostandyǵyn qamtamasyz etýge, óshpendilik turǵysyndaǵy qylmystarǵa qarsy is-qımylǵa zor mańyz beremiz. Qazaqstan bul salada halyqaralyq qurylymdarmen, onyń ishinde EQYU ınstıtýttarymen jan-jaqty baılanystardy ulǵaıtýǵa jáne óz tájirıbesimen bólisýge nıettenip otyr», - dedi B. Beknazarov.
Kezdesý barysynda dinı tózbeýshilikke, ekstremızm men terrorızmge qarsy is-qımyl máselelerine erekshe nazar aýdaryldy. Senat Tóraǵasynyń orynbasary «kez kelgen nanym-senim negiziniń burmalanbaýy, din saıasat pen ıdeologııanyń quralyna aınalmaýy tıis» ekenine senim bildirdi.
Áńgimeni aıaqtaı kelip, B. Beknazarov qazaqstandyq parlamentshilerdiń birlesken jobalardy iske asyrý aıasynda EQYU DIAQB-pen syndarly yntymaqtastyqqa ázir ekenin naqtylady.
Kezdesýge Senat depýtattary Dýlat Qusdáýletov pen Mıhaıl Bortnık qatysty.
