Bektas Beknazarov Bilim mınıstrine: Reformalardyń sanyn emes, sapasyn arttyrý kerek
NUR-SULTAN. QazAqparat – Bilim salasyna shetel tájirıbesin engizýde asyǵystyq tanytpaý kerek. Bul týraly Senat tóraǵasynyń orynbasary Bektas Beknazarov málim etti, dep habarlaıdy QazAqparat tilishisi.
«Búgingi talqylaý barysynda shetel tájirıbesi degenge kóbirek kóńil bólip otyrmyz. Shetel tájirıbesinde barlyǵy durys dep kim kepildik berip aıta alady?! Ár memlekettiń óziniń tıisti qurylymy, zańy, dili men ereksheligi, talaptary bar. Sondyqtan shetel tájirıbesi degen máselege toqtalsaq, ol qanshalyqty bizdiń memlekettiń múddesine sáıkes keledi? Osyǵan nazar aýdarýymyz kerek. Mysaly, Japonııada 12 jasqa deıingi balany mektepte tek qana japon tilinde oqytady. Sonyń arqasynda japon tili óz deńgeıin joǵaltpaı, barlyq jerde keńinen paıdalanylýda», - dedi B. Beknazarov Senattyń jalpy otyrysynda.
Bul turǵyda ol shetel tájirıbesin usynar aldynda osy jańashyldyqtar memleketimizdiń múddesine qanshalyqty saı keletinin tyńǵylyqty pysyqtaý kerektigin atap ótti.
«Ashat Qanatuly, ózińiz basshylyq jasaıtyn bilim jáne ǵylym salasyndaǵy reformalardyń sanyn ǵana emes, sapasyn arttyrý kerek. Kez kelgen reformanyń tıimdiligine basa nazar aýdarý qajet. Ol qanshalyqty qajet? Keltiretin zııandy tustary joq pa? Paıdaly ári utymdy baǵyttary qandaı? Atap aıtqanda, osy suraqtarǵa naqty jaýaptar bolýy tıis. Qandaı da bir reformany iske asyrmas buryn, aldyn ala jáne jan-jaqty zerdeleý jumystaryn júrgizip, ony qoǵamdyq talqyǵa salý kerek. Bilim salasynyń jaǵdaıyna qazir qoǵam qandaı baǵa berip jatqanyn bárimiz jaqsy bilemiz. Qoǵam úshin óskeleń urpaqty tárbıeleýde, ıaǵnı osyndaı mańyzdy máselelerde asyǵystyq jasaýǵa bolmaıdy», - dedi Bektas Beknazarov Bilim jáne ǵylym mınıstri Ashat Aımaǵambetovke qarata aıtqan sózinde.
Foto: ru.wikipedia.org
