Bektanov, Tóleshov, Ertaev, Ermegııaev jáne Túrkistannyń burynǵy ákimi qaıda
ASTANA. KAZINFORM – Qylmystyq-atqarý júıesi komıteti túzeý mekemelerinde jazasyn ótep jatqan birqatar sheneýnik pen bıznesmenniń shartty túrde merziminen buryn bostandyqqa shyǵý múmkindigine qatysty málimetpen bólisti.
Kazinform agenttiginiń resmı saýalyna QAJK bergen jaýapqa qaraǵanda, 1981 jyly dúnıege kelgen Kentaý qalasynyń burynǵy ákimi Aıýpov Rashıd Abatuly Jambyl oblysy boıynsha QAJ departamentiniń №25 qaýipsizdigi ortasha mekemesinde otyr. Ol 2028 jyldyń 10 jeltoqsanynan bastap qana resmı túrde merziminen buryn bostandyqqa shyǵa alady.
R.Aıýpov 10 jylǵa sottalǵan edi.
Eske salsaq, R. Aıýpov 2022 jyly naýryzda Túrkistan oblysy Kentaý qalasynyń ákimi bolyp taǵaıyndalǵan edi. Al, 2019 jyldyń shilde aıynan 2021 jylǵa deıin Túrkistan qalasynyń ákimi qyzmetin atqardy. Kentaý qalasynyń ákimi bolǵanǵa deıin Túrkistan oblysy ákiminiń orynbasary boldy. Oǵan iri kólemde para berýge ıtermeleý jáne alaıaqtyq jasaý aıyby taǵyldy.
Burynǵy bankır Ertaev Jomart Jádigeruly búginde Almaty qalasy, Almaty jáne Jetisý oblystary boıynsha QAJ departamenti №72 mekemesinde jazasyn ótep jatyr. Ol bul mekemege tergeý barysynda jetkizilgen. J.Ertaev 2020 jyldyń 20 maýsymynda jazasyn birshama jeńildetýge, al 2022 jyldyń 5 qańtarynda shartty túrde bosap shyǵýǵa ótinish berýge múmkindigi boldy. Alaıda, bir qyzyǵy QAJK málimetine qaraǵanda sottalýshy osy ýaqytqa deıin atalǵan eki múmkindigin de paıdalanbaǵan.
Aıta keteıik, 2019 jyldyń naýryzynda Qazaqstan Bas prokýratýrasynyń qyzmetkerleri qylmystyq jaýapqa tartý úshin Reseı Federatsııasynan Jomart Ertaevty ekstradıtsııalaǵan bolatyn. Oǵan 2018 jyldyń naýryz aıynda halyqaralyq izdeý jarııalanǵan. Ol 2011-2017 jyldar aralyǵynda qyzmettik jaǵdaıyn paıdalana otyryp, basqa tulǵalarmen aldyn ala kelisý arqyly «BANK RBK» AQ-nyń 144 mlrd teńgesin jymqyrdy degen kúdikke ilingen.
Bastapqyda Ertaevqa 11 jyldyq jaza kesken sot onyń kinásin moıyndaǵanyn, qylmystyq isti tergeýge kómekteskenin, zalaldy ishinara ótegenin, sondaı-aq kámeletke tolmaǵan balalary baryn eskere kele túrmede otyrý merzimin 9 jylǵa tómendetken edi.
«Syra koroli» retinde elimizge tanylǵan bıznesmen Tóleshov Toqtar Júsipuly Shyǵys Qazaqstan oblysy boıynsha QAJ departamentiniń №17 qaýipsizdigi ortasha mekemesinde otyr. Onyń shartty túrde merziminen bostandyqqa shyǵý múmkindigi 2029 jylydń 6 sáýirinde týyndaıdy.
Tóleshov Qylmystyq kodekstiń 245 baby, 3 bóligi «Uıymdarǵa salynatyn salyqty jáne (nemese) bıýdjetke tólenetin basqa da mindetti tólemderdi tóleýden jaltarý», 251-baby «Jekeshe notarıýstardyń, baǵalaýshylardyń, jeke sot oryndaýshylarynyń, medıatorlardyń jáne aýdıtorlyq uıym quramynda jumys isteıtin aýdıtorlardyń ókilettikterdi teris paıdalanýy» boıynsha, 28-baby «Qylmystyq quqyq buzýshylyqqa sybaılas qatysýshylardyń túrleri» boıynsha aıypty dep tanyldy. Oǵan 21 jyl bas bostandyǵynan aıyrý jazasy kesildi.
«Astana EKSPO-2017» UK» AQ-tyń burynǵy tóraǵasy Ermegııaev Talǵat Amangeldiuly Almaty qalasy, Almaty jáne Jetisý oblystary boıynsha QAJ departamenti qaýipsizdigi ortasha №75 mekemesinde jazasyn ótep jatyr. Ol 2025 jyldyń 11 naýryzynda shartty túrde merziminen buryn bostandyqqa shyǵýǵa ótinish bere alady.
2016 jyldyń maýsymynda ol 14 jylǵa sottalyp, múlki tárkilendi. Ermegııaev «Astana EKSPO-2017» Ulttyq kompanııasynyń burynǵy basshysy QR QK-niń 176-babynyń 4-bóligindegi «b» tarmaqshasymen qarastyrylǵan aýyr qylmystardy birneshe ret qasaqana jasady degen kúdikke ilikken. Aıyptaýshynyń aqparaty boıynsha, jymqyrylǵan qarajat kólemi 10,2 mıllıard teńgeni quraıdy. Onymen birge 22 adam sot aldynda jaýap berdi. Sot barysynda 12 aıyptalýshy tergeýmen kelisimge kelgen. 14 aıyptalýshy óz kinálaryn moınyna aldy.
Burynǵy Qorǵanys mınıstri Bektanov Murat Káribaıuly Abaı oblysy boıynsha QAJ departamentiniń qaýipsizdigi aralas №19 mekemesinde otyr. Ol 2029 jyldyń 24 shildesinen bastap shartty túrde merziminen buryn bostandyqqa shyǵýǵa ótinish bere alady.
M. Bektanov Qazaqstan Respýblıkasy Qylmystyq kodeksiniń 451-babynyń 3-bóligi boıynsha qylmystyq ister jónindegi mamandandyrylǵan aýdanaralyq áskerı sotynyń 2023 jyldyń 24 aqpanyndaǵy úkimimen sottaldy. Oǵan eń joǵary qaýipsizdik qylmystyq-atqarý júıesi mekemesinde jazasyn óteı otyryp, 12 jyl merzimge bas bostandyǵynan aıyrý túrindegi jaza taǵaıyndaldy. Ol 2022 jyldyń qańtaryndaǵy oqıǵalardan keıin Qylmystyq kodeksiniń 452-baby áreketsizdik faktisi boıynsha qamaýǵa alynǵan edi.
