Bekshın zerthanalar nege test jasaýdy toqtatqanyn túsindirdi
ALMATY. QazAqparat – Almatyda ótken onlaın brıfıng barysynda zerthanalar testileýdi nege toqtatqany belgili boldy, dep habarlaıdy QazAqparat tilshisi.
«Testileýge qatysty qazirgi ahýal týraly baıandaı keteıin. Sońǵy ýaqytta koronavırýs boıynsha epıdemıologııalyq ahýal nasharlap ketti. Bul - dıagnostıkalyq potentsıaldy arttyrýdy talap etip otyr. Qazir qalada 6 zerthana jumys istep tur. Bul zerthanalardyń qýaty táýligine - 4000 test. Buryn aqyly zerthanaǵa eshkim bara qoımasa, sońǵy aptada suranys qatty artty. Keıbir adamdar aıyna 3-4 ret PTR taldaýdan ótip jatyr. Oǵan obektıvti sebepter jeterlik», - dedi ol.
Jandarbek Bekshın kóptegen zerthanalar jumysyn toqtatqanyn aıtty.
«Olımp» KDZ qural-jabdyqtary isten shyqty. Olarǵa tehnıkalyq jóndeý jasaý kerek. Sol úshin «Olımp» jumysyn toqtatty. Sondaı-aq, olar 5000-ǵa jýyq synama alyp aldy. Solardy zerttep úlgerýi kerek. Sonymen qatar Ulttyq referens zerthanasynda ótinim kóp. Bul zerthanaǵa aqyly test qabyldaýǵa QR DSM tyıym salynǵan. Munda qazir tek memlekettik tapsyrys qana oryndalyp jatyr», - dedi J.Bekshın.
Qazir qalada tek Ulttyq saraptama ortalyǵynyń bólimshesi ǵana jumys istep tur. Bul ortalyqtyń óndiristik qýaty – táýligine 1000 test.
«Koreıalyq áriptesterimizben de másele týyndap otyr. Olarǵa da qajetti quraldy jetkizý úshin áýebaılanysy turaqty emes bolyp jatyr. Sonymen qatar «Halyq Arena» muz kesheni mańynda test qabyldaý pýnktisi ashylady», - dedi J.Bekshın.
Kelesi aptada dúısenbiden bastap – «Olımp» KDZ, sársenbiden bastap MPK Clinic jumysyn bastamaq.
