Bekshın ata-analardyń vaktsınatsııadan bas tartý sebebin aıtty

NUR-SULTAN. QazAqparat – QR Densaýlyq saqtaý mınıstrligi Taýarlar jáne kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary – bas memlekettik sanıtarııalyq dáriger Jandarbek Bekshın elimizde ata-analar nelikten balalaryn ınfektsııalyq aýrýlarǵa qarsy vaktsınatsııadan ótkizbeıtinin aıtty, dep habarlaıdy QazAqparat tilshisi.

«Ata-analardyń vaktsınatsııadan bas tartýy máselesin bilemiz. Sondyqtan, olarmen jumys júrgizetin arnaıy jospar qurdyq. Bas tartýdyń sebebi nede? Bas tartyp jatqan ata-analardyń 40 paıyzy ózimizdiń pikirimiz, quqyǵymyz bar deıdi. 35 paıyzy dinı kózqarasyn alǵa tartady. 6 paıyzy vaktsınaǵa sengisi kelmeıdi», - dedi Jandarbek Bekshın OKQ-da ótken baspasóz máslıhatynda tilshilerdiń suraǵyna jaýap bere otyryp.

Onyń aıtýynsha, BAQ kózderi arqyly vaktsınatsııalaýdyń qajettigi týraly nasıhat jumystary árdaıym júrgizilip turady.

«Dinı kózqarasy boıynsha bas tartatyndar bar. Kóbi ony bildirmeı, óz quqyǵym degendi aıtady. Resmı túrde 35 paıyzy – dinı kózqarasyna baılanysty ekpeden bas tartatynyn aıtyp jatyrmyz ǵoı. Biraq, biz osy sebep boıynsha bas tartatyndardyń odan da kóp ekenin bilemiz. Sondyqtan, olarmen jeke-jeke jumys júrgizilip jatyr. Eń bedeldi otbasylardyń ókilderimen – ata-analaryna, ata-ájelerine túsindirý jumysyn qolǵa aldyq», - dedi ol.

Jandarbek Bekshınniń sózine sensek, Qazaqstanda salynatyn vaktsınanyń bári de Dúnıejúzilik densaýlyq saqtaý uıymynyń sertıfıkattarymen alynady.

«Eń damyǵan eldiń vaktsınalary ákelinedi. Óz elimizde de ol qatań tekserýden ótedi. Ulttyq saraptama ortalyǵynda barlyq vaktsınalar saraptama men taldaýdan ótkiziledi. Jyl saıyn vaktsınatsııadan bas tartýdyń 5 myń jaǵdaıy tirkeledi: Túsindirý jumystaryn júrgizgennen keıin ótken jyly 3,5 myń adam óziniń oı-pikirin ózgertti», - dedi ol.