Bekire tuqymyn saqtap qalý: Qara Ertiske 93 myńnan astam shabaq jiberildi
ASTANA. KAZINFORM — Shyǵys Qazaqstanda sibir bekiresiniń popýlıatsııasyn saqtap qalýdyń ázirge birden-bir tıimdi joly — transshekaralyq Qara Ertiske qoldan shabaq jiberý. Bul joly ózenge 93 420 shabaq jiberildi, dep habarlaıdy Kazinform agenttiginiń tilshisi.
Baǵaly balyq shabaqtary Zaısan aýdany aýmaǵyndaǵy ózenge jiberildi.
Shilde men qazan aılary aralyǵynda shekara mańyndaǵy Boran aýylynyń janynda 4 aılyq tabıǵatty qorǵaý naýqany ótti. Mamandar osy ýaqyt ishinde arnaıy balyq ósirý sharýashylyqtarynda jetildirilgen shabaqtardy kezeń-kezeńimen tabıǵı ortaǵa beıimdep, ózenge jiberdi.
Ihtıologtardyń bul baǵyttaǵy aýqymdy jumysyna ózen basseınindegi ekologııalyq jaǵdaıdyń kúrdelenýi sebep bolǵan. Ótken ǵasyrda Ertis ózeninde iri sý elektr stantsııalarynyń kaskady salynýy balyqtardyń tarıhı kóshý joldaryn úzip, bekire tuqymdastardyń tabıǵı ýyldyryq shashatyn oryndaryna jetýine kedergi keltirdi.
Qazir ózenniń joǵarǵy aǵysynda tirshilik etetin sibir bekiresi ózdiginen kóbeıe almaıtyn jaǵdaıǵa jetken. Onyń saqtalýy memleket tarapynan shabaqtardy turaqty túrde sýǵa jiberýge tikeleı baılanysty.
— Sý bıologııalyq resýrstaryn qalpyna keltirý — janýarlar dúnıesin qorǵaý men óńirdegi tabıǵı tepe-teńdikti saqtaýdyń mańyzdy bóligi. Mundaı sharalarǵa balalar men jastardy tartý da asa mańyzdy. Balalar tabıǵatty qorǵaý týraly estip qana qoımaı, osyndaı aktsııalarǵa ózderi qatysqanda qorshaǵan ortaǵa jaýapkershilikpen qaraýdy úırenedi. Óskeleń urpaqqa ekologııalyq tárbıe berý naqty isterden bastalady, — dedi Shyǵys Qazaqstan oblysynyń Tabıǵı resýrstar jáne tabıǵat paıdalanýdy retteý basqarmasy janyndaǵy janýarlar dúnıesin qorǵaý bóliminiń basshysy Baýyrjan Áýbákirov.
Qara Ertistegi ekologııalyq sharaǵa Qumash Nurǵalıev atyndaǵy lıtseıdiń «Janýar saqshylary» mektep klýbynyń tárbıelenýshileri de qatysty. Oqýshylar ınspektorlarmen birge balyqtardy arnaıy sý jınaıtyn tsısternalardan ózen arnasyna jiberdi.
Naýqannyń ǵylymı jáne ınspektsııalyq baqylaýyn Balyq sharýashylyǵy ǵylymı-zertteý ortalyǵy Altaı fılıalynyń mamandary, Zaısan-Ertis basseındik ınspektsııasy jáne Zaısan men Marqakól orman sharýashylyqtarynyń qyzmetkerleri qamtamasyz etti.
Mamandar ózen salalaryna gıdrobıologııalyq monıtorıng júrgizýdi jalǵastyrady. Olar kúzgi-qysqy kezeńde balyqtardyń qorektik bazasyn jáne sýǵa jiberilgen shabaqtardyń tirshilikke beıimdelý deńgeıin baǵalaıdy.
Eske salaıyq, bıyl Qyzylorda oblysynda 3,7 mln shabaq qutqarylǵan bolatyn.
