Bekire tuqymdas balyq pen ýyldyryq satyp alǵandar qylmystyq jaýapkershilikke tartylady
ASTANA. KAZINFORM – Jaıyq-Kaspıı basseıniniń ekologııasyn qorǵaý jáne bıoártúrliligin saqtaý Atyraý oblysy prokýratýrasy qadaǵalaý qyzmetiniń basym baǵyttarynyń biri bolyp canalady.
Janýarlardyń sırek kezdesetin jáne quryp ketý qaýpi tóngen túrleriniń, onyń ishinde bekire tuqymdas balyqtar men olardyń derıvattarynyń zańsyz aınalymy erekshe alańdaýshylyq týǵyzady.
Júrgizilgen taldaý kórsetkendeı, balyqty zańsyz aýlaý kóbine brakonerlik ónimderdi satyp alatyn azamattardyń tutynýshylyq suranysymen yntalandyrylady.
2025 jyldyń qorytyndysy boıynsha oblystyń qylmystyq qýdalaý organdarymen ekologııa salasynda 30 quqyq buzýshylyq tirkeldi. 2025 jyldyń ishinde sottarǵa aıyptaý aktisimen 11 qylmystyq is joldanyp, olar boıynsha 10 tulǵaǵa aıyptaý úkimi shyǵaryldy.
Prokýratýra azamattardyń nazaryn mynaǵan aýdarady: Qazaqstan Qylmystyq kodeksiniń 339 jáne 339-1-baptaryna sáıkes, tek zańsyz aýlaýdy júzege asyratyn tulǵalar (brakonerler) ǵana emes, sonymen qatar sırek kezdesetin janýarlar men olardyń bólikterin zańsyz satyp alatyn, saqtaıtyn, ótkizetin nemese tasymaldaıtyn adamdar (satyp alýshylar men qaıta satýshylar) da qylmystyq jaýapqa tartylady.
Máselen, osy jyly sot úkimimen Atyraý qalasynyń turǵyny qylmystyq jaýapqa tartyldy. Onyń avtokóligin tintý barysynda 501,9 kg bekire tuqymdas balyq tabylyp, alyndy. Sot ony kináli dep tanyp, 7 jyl merzimge bas bostandyǵynan aıyrý jazasyn taǵaıyndady. Oǵan qosa sottalýshydan materıaldyq shyǵyn men memlekettik baj salyǵyn óteý esebine 304 mln teńgeden astam qarajat óndirilý mindetteldi.
- Atyraý oblysynyń prokýratýrasy eskertý jasady: zańdy bilmeý jaýapkershilikten bosatpaıdy. Jeke tulǵalardan tıisti ruqsat qujattarynsyz, shyǵý tegi kúmándi balyq pen ýyldyryqty satyp alý arqyly siz qylmystyq quqyq buzýshylyqtyń sybaılasyna aınalasyz, - delingen habarlamada.
Aıta keteıik, Batys Qazaqstanda zańsyz balyq tasymaldaǵan birneshe kúdikti ustaldy.
