Bekire qoryn saqtaý úshin Jaıyqqa mıllıonnan astam shabaq jiberildi
ASTANA.KAZINFORM — Aýyl sharýashylyǵy mınıstrligi Balyq sharýashylyǵy komıtetiniń «Atyraý bekire balyq ósirý zaýyty» mekemesi aǵymdaǵy jylǵa arnalǵan memlekettik tapsyrys sheńberinde Jaıyq ózenine bekire tuqymdas balyqtardyń 1 mıllıonnan astam shabaǵyn jiberdi. Bul týraly vedomstvonyń baspasóz qyzmeti málim etti.
Bul jumys popýlıatsııany jasandy jolmen molyqtyrýdy qamtamasyz etý jáne Qazaqstannyń Kaspıı teńiziniń sý bıologııalyq resýrstaryn saqtaý jónindegi memleketaralyq mindettemelerin oryndaý maqsatynda júzege asyryldy.
Atyraý bekire balyq ósirý zaýyty bekire tuqymdas balyqtardy ósimin molaıtý maqsatynda tabıǵı mekendeý ortasynan aýlaýdy júzege asyratyn memlekettik monopolııa sýbektisi.
Qoldanylyp otyrǵan bıotehnologııa basqa balyq ósirý kásiporyndarynda bekire ósirý úshin paıdalanylatyn ádisterden erekshelenedi, bul shyǵarylatyn shabaqtardyń ómirsheńdigi men tabıǵı ortaǵa beıimdelý deńgeıiniń joǵary bolýyn qamtamasyz etedi.
— Atap aıtqanda, ósirý toǵandarynda ósirý ádisi tabıǵı jaǵdaılarǵa barynsha jaqyn bolyp tabylady, sebebi ol tabıǵı qorektik bazanyń bolýyn; shabaqtardyń óz betinshe qorektený daǵdylarynyń qalyptasýyn; jyrtqyshtar men qustar tarapynan bolatyn qaýip-qaterge barabar jaýap berýin; tirshilik etýge qajetti minez-qulyq tetikteriniń qalyptasýyn qamtamasyz etedi, — delingen habarlamada.
Osylaısha, toǵan jaǵdaıynda ósirilgen shabaqtar qorekti ózdiginen tabady, temperatýralyq jáne gıdrologııalyq ózgeristerge jaqsy beıimdeledi jáne tabıǵı sý aıdyndaryna jiberilgennen keıin ómirsheńdigi edáýir joǵary bolady.
2026 jylǵa arnalǵan bekire tuqymdas balyqtardyń shabaqtarymen tolyqtyrý jónindegi memlekettik tapsyrysty oryndaý jumystary memlekettik organdardyń, ǵylymı qoǵamdastyqtyń jáne balyq sharýashylyǵy sýbektileriniń qatysýymen júıeli negizde jalǵasyp jatyr.
Aıta keteıik, batysta brakonerlerden 8 tonnadan asa balyq pen 10 keli ýyldyryq tárkilendi.
