«Bekire» aktsııasy: 694 adam ákimshilik jaýapkershilikke tartyldy
ASTANA. KAZINFORM – Bıyl naýryzda Atyraý, Mańǵystaý jáne Batys Qazaqstan oblystarynda «Bekire» balyq qorǵaý aktsııasyn ótkizý týraly sheshim qabyldanǵan bolatyn. Bul rette, QR Aýyl sharýashylyǵy, Іshki ister mınıstrligi birlesken qujatqa qol qoıyp, tabıǵat qorǵaý jáne quqyq qorǵaý organdarynyń birlesken is-qımyl jospary bekitildi.
Ortalyq kommýnıkatsııalar qyzmeti alańynda ótken brıfıngte AShM Balyq sharýashylyǵy komıteti tóraǵasynyń mindetin atqarýshy Aıan Bahııanov aktsııa jaıly aıtyp berdi.
Belgili bolǵandaı, aktsııa barysynda Jaıyq-Kaspıı oblysaralyq balyq sharýashylyǵy basseındik ınspektsııasynyń ınspektorlary, quqyq qorǵaý, tabıǵat qorǵaý organdary jáne QR UQK Shekara qyzmetiniń qyzmetkerleri tabıǵat qorǵaý zańnamasynyń 945 buzýshylyǵyn anyqtap, nátıjesinde 694 adam ákimshilik jaýapkershilikke tartylǵan.
«Brakonerlik jáne sırek kezdesetin sondaı-aq quryp ketý qaýpi tóngen balyq túrlerimen zańsyz qarym-qatynas jasaý faktileri boıynsha 71 qylmystyq is qozǵaldy. Zań buzýshylarǵa 19,4 mln teńge aıyppul salyndy. Zańsyz aınalymnan 11 tonna 308 keli balyq, onyń ishinde 2 tonna 229,5 kg bekire tuqymdas balyqtar, 8 kg 328 gramm bekire ýyldyryǵy, 162 birlik balyq aýlaý quraldary jáne 44 birlik sý kóligi tárkilendi. Ózen arnasy men teńiz akvatorııasyn kúndelikti traýlıng nátıjesinde sý aıdyndarynan jalpy uzyndyǵy 300 km-den asatyn 1416 birlik zańsyz balyq aýlaý quraldary alyndy», – dedi Aıan Bahııanov.
Aıta keteıik, 2024 jyly ýyldyryq shashý kezeńi bastalǵannan beri baqylaýdaǵy sý aıdyndarynda balyq sharýashylyǵy komıtetiniń oblysaralyq basseındik ınspektsııalary ákimshilik quqyq buzýshylyq týraly 848 hattama toltyrǵan. Onyń ishinde 134 materıal ákimshilik jaýapkershilikke tartý úshin 383-bap boıynsha sot organdaryna jiberilgen.
«Balyq aýlaý erejelerin óreskel buzýǵa jol bergeni úshin quqyq qorǵaý organdaryna qylmystyq is qozǵaý úshin 5 jeke tulǵaǵa qatysty 3 materıal jiberildi. Buzýshylardan memleket kirisine 2 784 tonna zańsyz aýlanǵan balyq, 286 aýlaý quraly, sondaı-aq 16 júzý quraly tárkilendi. 14 mln teńgeden astam somaǵa aıyppul salyndy. 4,1 mln teńge somasyna balyq resýrstaryna keltirilgen zalal úshin talap qoıyldy», – dedi spıker.
