«Bekire – 2026» aktsııasy aıasynda Atyraýdaǵy joldarda 18 mobıldi beket jumys isteıdi
ATYRAÝ. KAZINFORM – 1 sáýirden bastap Atyraý, Mańǵystaý jáne BQO-da «Bekire – 2026» keń aýqymdy balyq qorǵaý aktsııasy bastalady.
QR Aýyl sharýashylyǵy mınıstrligi Balyq sharýashylyǵy komıtetiniń tóraǵasy Serik Sermaǵambetovtiń aıtýynsha, bul shara tek baqylaýmen shektelmeıdi.
– Bul aktsııa tek baqylaý sharasy ǵana emes, tabıǵı resýrstardy saqtaý jáne ýyldyryq shashý kezeńinde balyqtarǵa qolaıly jaǵdaı jasaýǵa baǵyttalǵan. Birlesken jumys bekire jáne balyqtyń basqa túrlerin saqtaýda oń nátıje beredi. Aktsııany ótkizý kezinde negizinen Jaıyq-Kaspıı basseınine kiretin sý aıdyndarynda jumysty kúsheıtý kerek, – dedi ol.
Batys óńirindegi 3 oblystyń aýmaǵynda aktsııaǵa qatysatyn taraptardyń 1143 qyzmetkeri jumyldyrylady. 91 qaıyq, 226 avtokólik, 6 dron qamtamasyz etilgen. Qajet bolǵan jaǵdaıda tikushaq paıdalanylady.
Sonymen qatar komıtet tóraǵasy balyq ónimderiniń zańdylyǵyn baqylaý maqsatynda «e-Fish» aqparattyq júıesi engizilgenin atap ótti. Atalǵan platforma balyqty aýlaýdan bastap, sońǵy tutynýshyǵa deıingi barlyq kezeńdi tsıfrlyq túrde qadaǵalaýǵa múmkindik beredi.
Atyraý oblysy Polıtsııa departamentiniń Qoǵamdyq qaýipsizdik basqarmasy bastyǵynyń orynbasary Amanjol Jumalıevtiń málimetinshe, aktsııa barysynda quqyq qorǵaý organdary kúsheıtilgen rejımde jumys isteıdi.
– Oblys boıynsha 300-ge jýyq polıtsııa qyzmetkeri jumyldyrylyp, Jaıyq ózeni men Kaspıı teńizi aýmaǵynda birlesken reıdter júrgiziledi. Sonymen qatar respýblıkalyq jáne oblystyq mańyzy bar tasjoldarda 18 mobıldi beket jumys isteıdi. Jaıyq ózeniniń jaǵalaýynda beınebaqylaý kameralary arqyly táýlik boıy monıtorıng júrgiziledi, – dedi ol.
Budan bólek, shekara qyzmeti Kaspıı teńiziniń akvatorııasy men shekaralyq aımaqtarda zańsyz balyq aýlaý men tasymaldaýdyń jolyn kesý baǵytynda jumystar júrgizedi.
Aıta keteıik, ótken jyly atalǵan aktsııa aıasynda jalpy 1125 quqyqbuzýshylyq anyqtalyp, 867 adam ákimshilik jaýapkershilikke tartylǵan. 21 mln teńge aıyppul salyndy. 33 qylmystyq is qozǵalyp, zańsyz aınalymnan 4,5 tonna balyq, onyń ishinde 1,3 tonna bekire tuqymdas balyq tárkilendi. Olardyń qatarynda 2 keli bekire tuqymdas balyqtyń ýyldyryǵy, 863 qural jáne 44 tehnıka bar. Qozǵalǵan qylmystyq ister boıynsha balyq resýrs qoryna keltirilgen zalal 784 mln teńgeni quraǵan.
Osyǵan deıin Túrkistan oblysynda brakonerlerden 130 kelige jýyq balyq tárkilengenin jazǵan edik.
