«Bekire – 2025»: Úsh oblysta brakonerlerge qatysty 33 qylmystyq is qozǵaldy
ATYRAÝ. KAZINFORM – Batystaǵy 3 oblysta «Bekire – 2025» keńaýqymdy balyq qorǵaý aktsııasy kezinde tabıǵat qorǵaý zańnamasyn buzǵandarǵa 21,5 mln teńgeniń aıyppuly salyndy.
Jaıyq-Kaspıı oblysaralyq basseındik balyq sharýashylyǵy ınspektsııasynyń baspasóz qyzmetinen málim etkendeı, balyq qorǵaý aktsııasy 1 sáýir-31 mamyr aralyǵynda ótti.
– Atalǵan aktsııa Atyraý, Mańǵystaý jáne Batys Qazaqstan oblystaryndaǵy Jaıyq-Kaspıı sý basseıniniń aıdyndarynda bekire tuqymdas jáne basqa da balyq túrleriniń ýyldyryq shashýyna qolaıly jaǵdaı jasaý maqsatynda ótkizildi. Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary men shekara qyzmetiniń, quqyq qorǵaý organdarynyń qyzmetkerleri tabıǵatty qorǵaý zańnamasyn buzýǵa qatysty 1125 faktini anyqtady. Balyq qorǵaý zańnamasyna qaıshy áreket jasaǵan 867 adam ákimshilik jaýapkershilikke tartyldy. Brakonerlik jáne sırek kezdesetin, joıylyp bara jatqan balyq túrlerin zańsyz aýlaý deregimen 33 qylmystyq is qozǵaldy. Quqyq buzýshylarǵa 21,5 mln teńge aıyppul salyndy, -dep habarlady ınspektsııanyń baspasóz qyzmeti.
Sondaı-aq, zańsyz aınalymnan 4 tonna 505 keli balyq tárkilengen. Onyń ishinde 1 tonna 330 keli bekire tuqymdas balyq túrleri, 2,006 keli bekireniń qara ýyldyryǵy bar. Brakonerlerden 202 balyq aýlaý quraly, 44 sý kóligi alynǵan.
– Kún saıyn Jaıyq-Kaspıı sý basseıniniń arnalaryna súzý jumysy júrgizildi. Sonyń nátıjesinde sý aıdyndarynan 661 zańsyz balyq aýlaý quraly shyǵaryldy, -dep málim etti ınspektsııanyń baspasóz qyzmetinen.
Eske sala ketelik, budan buryn «Bekire – 2025» aktsııasy kezinde batystaǵy 3 oblysta brakonerlerge 10,9 mln teńge aıyppul salynǵanyn jazǵan edik.