«Bekire – 2025»: Elimizdiń batysynda keńaýqymdy balyq qorǵaý aktsııasy bastaldy

ATYRAÝ. KAZINFORM – 1 sáýirde elimizdiń batysyndaǵy Atyraý, Mańǵystaý jáne Batys Qazaqstan oblysynda «Bekire – 2025» balyq qorǵaý aktsııasy bastaldy. Keńaýqymdy aktsııaǵa 1500-ge jýyq qyzmetker qatysady.

«Бекіре – 2025»: Еліміздің батысында кеңауқымды балық қорғау акциясы басталды
Фото: Фот-шекара қызметі

Balyq sharýashylyǵy komıtetiniń tóraǵasy Serik Sermaǵambetovtiń aıtýynsha, balyq qorǵaý aktsııasy 31 mamyrǵa deıin jalǵasady. 

– Bul kezeńde tabıǵat jáne quqyq qorǵaý organdarynyń qyzmetkerleri baǵaly bekire tuqymdas balyq túrlerin brakonerlerden qorǵap, ýyldyryq shashýyn qamtamasyz etedi. Óıtkeni jyl saıyn bekire tuqymdas balyqtardyń sany azaıyp barady. Sol sebepten Aýyl sharýashylyǵy, Іshki ister mınıstrleri men Ulttyq qaýipsizdik komıteti tóraǵasynyń «Bekire» balyq qorǵaý aktsııasyn ótkizý týraly birlesken buıryǵyna qol qoıyldy. Soǵan sáıkes balyq qorǵaý aktsııasyn úılestirý shtaby qurylyp, oǵan jetekshilik etý Balyq sharýashylyǵy komıtetine júkteldi, - dedi Serik Sermaǵambetov. 

Onyń málimetine súıensek, balyq qorǵaý aktsııasyn ótkizýge 1466 qyzmetker jumylady. Onyń ishinde Atyraý oblysynda 604, Batys Qazaqstanda – 222, al Mańǵystaý óńirinde 640 qyzmetker sý aıdyndarynda qadaǵalaý júrgizedi. Sondaı-aq 298 avtokólik, 84 qaıyq pen shaǵyn kólemdi keme, 6 ushý apparaty, tehnıkalyq quraldar tartylǵan. 

Shekara qyzmeti Atyraý oblysy boıynsha departamenti bastyǵynyń birinshi orynbasary Aıdos Kıkabaevtyń deregine qaraǵanda, brakonerlik jıi bolatyn aýmaqtarda statsıonarlyq jáne jyljymaly beketter, mobıldi toptar uıymdastyrylady. 

– Kaspıı teńiziniń jaǵalaýy men akvatorııasynda, Jaıyq pen Qıǵash ózenderiniń saǵasynda baqylaý kúsheıtiledi. Áýejaılar, vokzaldar men avtojoldarda balyq pen balyq ónimderin zańsyz tasymaldaýǵa qarsy is-sharalar júrgiziledi. Bizdiń negizgi mindetimiz – memlekettik shekara mańynda brakonerlik áreketterdi der kezinde anyqtaý. Biz baqylaý beketteriniń jumysyn kúsheıtip, Jaıyq-Kaspıı sý basseıninde, ózen-kólderde patrýldeý jumysyn jalǵastyramyz, - dep málim etti Aıdos Kıkabaev. 

Eske sala ketelik, buǵan deıin Atyraý turǵynynyń kóliginen 1,5 keli bekire ýyldyryǵy tárkilengenin  jazǵan bolatynbyz

Сейчас читают