«Bekire – 2025»: Batystaǵy 3 oblysta brakonerlerge 1,9 mln teńge aıyppul salyndy
ATYRAÝ. KAZINFORM – 1 sáýirden beri Atyraý, Batys Qazaqstan jáne Mańǵystaý oblysynda «Bekire – 2025» keńaýqymdy balyq qorǵaý aktsııasy ótip jatyr. Osy kezge deıin brakonerlikke qatysy bar quqyq buzýshylarǵa 10,9 mln teńge aıyppul salyndy.
Jaıyq-Kaspıı oblysaralyq balyq sharýashylyǵy ınspektsııasynyń baspasóz qyzmetinen málim etkendeı, 1 sáýirden beri tabıǵat qorǵaý zańdylyǵyn buzýǵa baılanysty 593 derek anyqtalǵan.
– Elimizdiń úsh oblysynda quqyq buzǵan 445 adam ákimshilik jaýapqa tartyldy. Olarǵa 10,9 mln teńge aıyppul salyndy. Brakonerlikke, baǵaly bekire tuqymdas balyqtyń zańsyz aınalymyna qatysty 19 qylmystyq is qozǵaldy. Zańsyz aınalymnan 2 tonna 770 keli balyq tárkilendi. Onyń ishinde 582 keli bekire tuqymdas balyq, 2 keli qara ýyldyryq bar. Quqyq buzýshylardan 128 aý, 6 sý kóligi alyndy. Sý aıdyndarynan tyıym salynǵan 379 balyq aýlaý quraly shyǵaryldy, -dep habarlady ınspektsııanyń baspasóz qyzmeti.
Jaıyq-Kaspıı sý basseınindegi keńaýqymdy balyq qorǵaý aktsııasy 31 mamyrǵa deıin jalǵasady.
Eske sala ketelik, budan buryn Atyraý oblysynda «Bekire – 2025» aktsııasy aıasynda 1 sáýirden beri 311 keli bekire tárkilengenin habarlaǵan bolatynbyz.
Keıin Atyraýda bekire ýyldyryǵyn zańsyz tasymaldaǵan turǵyn ustalǵanyn jazǵan edik.