«Bekire – 2025»: Atyraý oblysynda 1 sáýirden beri 311 keli bekire tárkilendi
ATYRAÝ. KAZINFORM – Atyraý oblysynda 1 sáýirden beri zańsyz aınalymnan 1 tonna 637 keli balyq ónimderi tárkilendi. Onyń ishinde 311 keli bekire tuqymdas balyq bar.
Atyraý oblystyq polıtsııa departamentiniń baspasóz qyzmetinen málim etkendeı, balyq qoryna qylmystyq qol suǵýshylyqqa qarsy kúres bóliminiń qyzmetkerleri 1 sáýirden beri brakonerlik is-árekettiń, bekire tuqymdas jáne basqa balyq túrlerin zańsyz aýlaýǵa qatysty 101 derekti anyqtaǵan.
– «Bekire – 2025» keńaýqymdy balyq qorǵaý aktsııasy aıasynda zańsyz aınalymmen baılanysty 101 quqyq buzýshylyq tirkeldi. Al 6 is qujaty boıynsha kúdiktilerdiń is-áreketinde qylmys quramy anyqtaldy. Qazir sotqa deıingi tergep-tekserý amaldary júrgizilip jatyr. Quqyq buzýshylardan 1 qaıyq, 26 tor qural, 1 tonna 637 keli balyq ónimderi tárkilendi. Onyń ishinde 311 keli bekire tuqymdas balyq pen 2 keliden astam bekire balyǵynyń ýyldyryǵy bar, -dep habarlady departamenttiń baspasóz qyzmeti.
Tárkilengen baǵaly bekire balyq zaýytyna tapsyrylǵan.
Eske sala ketelik, budan buryn Atyraýda «Bekire – 2025» aktsııa bastalǵaly brakonerlerge 5,6 mln aıyppul salynǵanyn jazǵan bolatynbyz.