«Bekire-2024»: Elimizdiń batysynda keń aýqymdy balyq qorǵaý aktsııasy bastaldy
ATYRAÝ. KAZINFORM – Búgin elimizdiń batysyndaǵy sý aıdyndarynda «Bekire – 2024» keń aýqymdy balyq qorǵaý aktsııasy bastaldy. Atyraý, Batys Qazaqstan jáne Mańǵystaý oblystaryndaǵy bul aktsııa 31 mamyrǵa deıin jalǵasady.
Balyq sharýashylyǵy komıteti tóraǵasynyń orynbasary Aıan Bahııanovtyń aıtýynsha, atalǵan aktsııany ótkizý úshin Aýyl sharýashylyǵy jáne Іshki ister mınıstrleri men Ulttyq qaýipsizdik komıteti tóraǵasynyń birlesken buıryǵy qabyldanǵan. Soǵan sáıkes úılestirý shtabynyń quramy men Jaıyq-Kaspıı sý basseıninde keń aýqymdy balyq qorǵaý aktsııasyn ótkizý jónindegi birlesken is-qımyl jospary bekitilgen.
«Aktsııaǵa batystaǵy úsh oblystan 1 177 qyzmetker jumyldyrylyp otyr. Onyń ishinde 374 qyzmetker Atyraý oblysynda, 254 qyzmetker Batys Qazaqstan oblysynda, al 549 maman men áskerı qyzmetshiler Mańǵystaý oblysynyń aýmaǵynda aktsııanyń sátti ótýine atsalysady. Olar 80 qaıyqpen, shaǵyn kólemdi júzý quraldarymen, 254 avtokólik jáne kvadratsıklmen, 6 dronmen qamtyldy. Al shekarashylar sý aıdyndarynyń jaǵalaýyndaǵy 3 radıolokatsııalyq stansany paıdalanady», - dep habarlady Aıan Bahııanov.
Onyń aıtýyna qaraǵanda, aktsııa aıasynda brakonerlik faktiler jıi baıqalýy yqtımal aýmaqtarda jyljymaly beketter men mobıldi reıdtik toptar uıymdastyrylady. Osyǵan baılanysty negizgi kúshter men quraldar Kaspıı teńiziniń jaǵalaýy men akvatorııasynda, Jaıyq pen Qıǵash ózenderiniń saǵalyq keńistiginde shoǵyrlanady.
Sondaı-aq Jaıyq ózeniniń jaǵalaýy 15 vıdeokameramen baqylanady. Eske sala ketelik, buǵan deıin batystaǵy sý aıdyndarynda «Bekire-2024» keń aýqymdy aktsııasy bastalatynyn jazǵan edik.
