«Bekire-2024»: Atyraýlyq júrgizýshi 124,5 keli bekiremen ustaldy
ATYRAÝ. KAZINFORM – Atyraýda «Bekire-2024» aktsııasy aıasyndaǵy birlesken reıd kezinde jeńil kólik júrgizýshisi ustaldy. Kólikten 124,5 keli bekire tárkilendi.
Balyq sharýashylyǵy komıteti baspasóz qyzmetiniń aqparatyna qaraǵanda, birlesken reıd búgin 5 sáýirde ótkizilgen.
«Birlesken reıdke Atyraý oblysy mamandandyrylǵan tabıǵat qorǵaý prokýratýrasynyń úılestirýimen shekara qyzmeti departamentiniń, Jaıyq-Kaspıı oblysaralyq basseındik balyq sharýashylyǵy ınspektsııasy men oblystyq polıtsııa departamenti balyq qoryna qylmystyq qol suǵýshylyqqa qarsy kúres bóliminiń qyzmetkerleri qatysty. Reıd kezinde Damby aýylynyń mańyndaǵy Peshnoı túbegi tekserildi. Óıtkeni Jaıyq ózeniniń saǵasyndaǵy bul túbekten Prımorsk kanalymen Kaspıı teńizine shyǵýǵa bolady», - dep habarlady komıtettiń baspasóz qyzmeti.
Tańǵy 5:00 shamasynda Prımorsk kanaly aımaǵynda shekara qyzmetiniń qyzmetkerleri VAZ markaly avtokólikti toqtatqan.
«Jeńil kólikti tekserý kezinde jalpy salmaǵy 124,5 keli bekire tuqymdas balyq tabyldy. Baǵaly balyq 5 qapshyqqa oralǵan. Balyq qoryna aldyn ala esepke sáıkes 68 948 100 teńge zalal keltirilgen», - dep málim etti komıtettiń baspasóz qyzmetinen.
Oqıǵa ornyna polıtsııanyń jedel-tergeý toby shaqyrylyp, hattama toltyryldy. Zańsyz balyq tasymaldaýǵa qatysty derek QR Qylmystyq kodeksiniń 339-baby belgileri men sotqa deıingi tergep-tekserýdiń biryńǵaı tizilimine tirkelgen. Baǵaly balyq tárkilenip, kólik arnaıy aıyp turaǵyna qoıylǵan.
Eske sala ketelik, budan buryn Atyraýda brakonerler 313 keli bekireni qamys arasyna jasyrǵanyn jazǵan edik.
