«Bekire-2024»: Atyraý oblysynyń turǵyny 27,6 keli bekiremen ustaldy
ATYRAÝ. KAZINFORM – Atyraý oblysynda 25 balyq aýlaý zańdylyǵyn buzǵany anyqtalyp otyr. Quqyq buzǵan turǵynnyń birinen 27,6 keli bekire tárkilendi.
Atyraý oblystyq polıtsııa departamentiniń baspasóz qyzmetinen málim etkendeı, 10 qyrkúıekten beri «Bekire-2024» jedel profılaktıkalyq is-sharasynyń kúzgi kezeńi bastaldy.
«Bul is-sharanyń maqsaty – bekire jáne basqa da balyq túrlerin zańsyz aýlaýdyń jolyn kesý. Balyq qoryna qylmystyq qol suǵýshylyqqa qarsy kúres bóliminiń qyzmetkerleri balyqty zańsyz aýlaǵan 25 adamǵa qatysty ákimshilik hattama toltyrdy. Jedel izdestirý is-sharalaryn júrgizý kezinde Qurmanǵazy aýdanynyń azyq-túlik dúkenderiniń birinde zańsyz balyq aýlaýmen aınalysqan 1995 jylǵy er adam ustaldy. Tekserý barysynda odan salmaǵy 27 keli 620 gramm bolatyn bekire tuqymdas balyq ónimderi tárkilendi. Atalǵan derekke qatysty QR Qylmystyq Kodekstiń 339-babymen (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sotqa deıingi tergep-tekserý júrgizý bastaldy», - dep habarlady departamenttiń baspasóz qyzmeti.
Ózge aqparat QR Qylmystyq-protsestik kodekstiń 201-babyna sáıkes jarııalaýǵa jatpaıdy.
Eske sala ketelik, budan buryn Atyraý oblysynda zańsyz balyq aýlaýshylardan 1,8 tonna bekire tárkilengenin habarlaǵan edik.
