Bekman Soılybaev tıtýldyq jekpe-jek aldynda salmaq ólsheý rásiminen ótti
ASTANA. QazAqparat - AQSh-tyń Las-Vegas qalasynda Golden Boy promoýterlik kompanııasy ótkizetin kásipqoı boks keshiniń qarsańynda salmaq ólsheý rásimi ótti, dep habarlaıdy «QazAqparat» HAA VKontakte jelisindegi «Profı Boks Kazahstana» tobyna silteme jasap.
Osy boks keshinde qazaqstandyq Bekman Soılybaev (11-0, 4KO) 29 jastaǵy meksıkalyq boksshy Fernando Vargasqa (32-12-3, 21KO) qarsy sharshy alańǵa shyǵady.
Boksshylar birinshi jeńil salmaqtyń talaptarynan (58,9 kılogramǵa deıin) shyǵa bildi. Jekpe-jekte Soılybaevqa tıesili WBC International chempıondyq tıtýly sarapqa salynady.
Qyzyqty básekeni ESPN jáne «Habar» telearnalary tikeleı efırden kórsetedi. Translıatsııanyń bastalýy Astana ýaqytymen 20 qazan kúni tańǵy 07:00-ge josparlanǵan.
