Bekman Soılybaev GGG-diń burynǵy qarsylasymen bir rıngte judyryqtasady
Boks álemindegi tanymal portaldardyń biri boxingscene.com aqparatyna sáıkes, 19 qazandaǵy eń basty kezdesýdi orta salmaqtyń sańlaǵy Gabrıel Rosado (23-11, 13 KOs) men Glena Tapıa (23-4, 15 KOs) ótkizedi. Osy tusta aıta keterligi, Gabrıel Rosado men Gennadıı Golovkın 2013 jyly qańtar aıynda qolǵap túıistirgen bolatyn. Aıqastyń nátıjesi boıynsha, qazaqstandyq chempıon qarsylasyn jetinshi raýndta tehnıkalyq nokaýtpen jeńdi. Golovkın sol joly óziniń kásibı bokstaǵy 25-shi jeńisine qol jetkizgen edi.
Boks keshinde sonymen qatar, meksıkalyq Alehandro Barrera (27-3, 17 KOs) amerıkalyq Keandre Gıbsonmen (17-1-1, 7 KOs) qolǵap túıistiredi. Amerıkalyq Frantsısko Esperanza (6-0, 2 KOs), Izrael Dýffýstyń (15-4, 12 KOs) qarsylastary jýyq arada anyqtalmaq. Al qazaqstandyq Bekman Soılybaev sol keshte Fernando Vargaspen sharshy alańǵa shyǵady.
Boks keshiniń shymyldyǵyn alty raýndtyq aıqasta ekinshi jartylaı salmaqtaǵy Rendı Moreno (9-1, 8 KOs) men Hesýs Agınaga (5-5-2) ashady.
Dodanyń barlyǵyn tanymal sporttyq telekanal Golden Boy Boxing tikeleı efırde kórsetetin bolady.
Buǵan deıin habarlaǵanymyzdaı , 19 qazan kúni Bekman Soılybaev óziniń WBC International chempıondyq belbeýin qorǵaıtyn bolady. Bekmannyń qarsylasy - meksıkalyq Fernando Vargas. Kásipqoı sharshy alańda 47 aıqas ótkizgen 29 jastaǵy Vargas, sonyń 32-sinde jeńiske jetken, úsh jekpe-jegi teń aıaqtalǵan. Kásipqoı bokspen 2006 jyldan beri aınalysyp keledi. Óz kezeginde kásipqoı boksta 11 aıqas ótkizip, barlyǵyn jeńispen aıaqtaǵan jerlesimiz ekinshi jeńil salmaq dárejesindegi WBC International chempıondyq belbeýiniń ıegeri. Búginde Bekman Soılybaev Los-Andjeleste belgili maman Erık Braýnnyń qaramaǵynda jattyǵyp júr.
