Bekman Soılybaev AQSh-ta meksıkalyq boksshymen aıqasady
ASTANA. QazAqparat - Bekman Soılybaev Las-Vegasta Fernando Vargaspen aıqasady, dep habarlaıdy QazAqparat tilshisi.
Las-Vegasta 19 qazan kúni úlken kásipqoı boks keshi ótedi. Álemge áıgili ESPN sporttyq telearnasy arqyly qalyń kópshilikke kórsetiletin atalmysh jekpe-jek keshinde Diamond Ring boksshysy Bekman Soılybaev óziniń WBC International chempıondyq belbeýin qorǵaıtyn bolady.
Bekmannyń qarsylasy - meksıkalyq Fernando Vargas. Kásipqoı sharshy alańda 47 aıqas ótkizgen 29 jastaǵy Vargas, sonyń 32-sinde jeńiske jetken, úsh jekpe-jegi teń aıaqtalǵan. Kásipqoı bokspen 2006 jyldan beri aınalysyp keledi.
Óz kezeginde kásipqoı boksta 11 aıqas ótkizip, barlyǵyn jeńispen aıaqtaǵan jerlesimiz ekinshi jeńil salmaq dárejesindegi WBC International chempıondyq belbeýiniń ıegeri. Búginde Bekman Soılybaev Los-Andjeleste belgili maman Erık Braýnnyń qaramaǵynda jattyǵyp júr.
Las-Vegastyń «Monte Carlo Resort and Casino» kesheninde ótetin kásipqoı boks keshin Oskar De La Hoııa basqaratyn «Golden boı» promoýterlik kompanııasy uıymdastyrady. Keshtiń basty jekpe-jeginde qazaqstandyq Gennadıı Golovkınniń burynǵy qarsylasy pýertorıkolyq Gabrıel Rosado (23-11, 13 KOs) men AQSh boksshysy orta salmaqtaǵy úzdikterdiń biri Glen Tapıa (23-4, 15 KOs) sharshy alańǵa shyǵady.
