Bekire kontrabandasyna qatysty qylmystyq ister qozǵalyp, oǵan baılanysy bar quqyq qorǵaý organdarynyń qyzmetkerleri tıisti jazasyn alýy tıis - Premer-Mınıstr
ASTANA. Maýsymnyń 21-i. QazAqparat /Qanat Mámetqazyuly/ - Bekire kontrabandasyna qatysty qylmystyq ister qozǵalyp, oǵan baılanysy bar quqyq qorǵaý organdarynyń qyzmetkerleri tıisti jazasyn alýy tıis.
Búgin QR Parlamenti palatalarynyń birlesken otyrysynda depýtattardyń saýalyna jaýap bergen Úkimet basshysy Kárim Másimov osylaı málim etti.
«Men ótken aptada jumys saparymen Atyraý oblysynda boldym. Soǵan baılanysty bekire óndirisi boıynsha toqtalǵym keledi. Depýtattar qoldaǵan bekire óndirýge memlekettik monopolııa engizý týraly zań óte oryndy júzege asty, bul durys qadam dep oılaımyn. ıAǵnı, endigi kúni bizde bekire óndirisinde memlekettik monopolııa bolady. Ekinshiden, ókinishke qaraı sońǵy jyldary bekire kontrabandasynyń tómendeý úderisi bilinbeıdi. Kerisinshe, onyń kórsetkishteri ósýde. Buǵan quqyq qorǵaý organdary qyzmetkerleriniń qatystary da bar bolyp otyr», dedi K. Másimov.
Sonymen birge Úkimet basshysy qolynda dál osy máseleler jóninde naqty faktiler bar ekenin, ony prokýratýraǵa tapsyratynyn, sondaı-aq Memleket basshysyna bul baǵytta muqııat, tereń tekserýler júrgizý týraly ótinish jasaıtynyn málimdedi. «Bekirege qatysty barlyq kontrabandamen aınalysýshylar ustalyp, osyny qorǵashtaıtyn quqyq qorǵaý organdary qyzmetkerleri jazasyn alýy tıis. Men osy máselede qylmystyq is qozǵalý týraly ótinish jasaıtyn bolamyn», dedi K. Másimov.
