Bekire balyqtarynyń zańsyz aınalymy úshin qylmystyq jaza qatańdatyldy

ATYRAÝ. QazAqparat - 2019 jyly «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» Zańmen brakonerlik úshin jaza kúsheıtildi.

Bul týraly QazAqparat Atyraý oblysynyń mamandandyrylǵan tabıǵat qorǵaý prokýratýrasynyń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, búginge, Atyraý oblysynyń mamandandyrylǵan tabıǵat qorǵaý prokýratýrasynyń úılestirýimen ýákiletti organdarmen zańsyz balyq aınalymyna qarsy kúreste birqatar jumys atqaryldy.

Atap aıtqanda, balyqtardy, onyń ishinde bekire tuqymdas balyqtaryn zańsyz qolǵa túsirý, ıemdený, tasymaldaý, saqtaý jáne ótkizý qylmystary úshin 93 adam sottaldy, onyń 26-sy – naqty bas bostandyǵynan aıyrý jazasyna kesildi.

Olardyń zańsyz is-áreketteri nátıjesinde memleketke 1,2 mlrd teńge zalal keltirilgen.

Mysalǵa, azamat «Sh.R.» bekire tuqymdas balyqtaryn zańsyz ıemdengeni jáne saqtaǵany úshin memleketke keltirilgen 130 mln teńge zalal óndirilip, 3 jyl merzimge bas bostandyǵynan aıyrýǵa sottalǵan.

«Tabıǵatqa keltirilgen zalal tek bekire tuqymdas balyqtary men onyń derıvattaryn aýlaǵandarǵa ǵana emes, ony zańsyz ıemdengen, saqtaǵan jáne tasymaldaǵandarǵa da qoıylatynyn atap ótý qajet.

Osyǵan baılanysty, oblys turǵyndary men qonaqtaryn bekire tuqymdas balyqtary men derıvattaryn arnaıy dúkenderden jáne olardyń zańdylyǵyn rastaıtyn qujattary bolǵan kezde ǵana satyp alý qajettiligine nazar aýdaramyz»,-delingen habarlamada.