«Bekire-2015» naýqany barysynda zańsyz aýlanǵan 27 tonna balyq tárkilendi - QR AShM

ASTANA. QazAqparat - Bıyl «Bekire-2015» naýqanynda balyq qorǵaý ınspektorlary brakonerlerden 27 tonna balyq (onyń ishinde bekire balyǵy - 1 tonna), shamamen 18 keli qara ýyldyryq, 1200 balyq aýlaý men 176 júzý quraldaryn tárkiledi. Bul týraly búgin Aýyl sharýashylyǵy vıtse-mınıstri Erlan Nysanbaev Ortalyq kommýnıkatsııalar qyzmetindegi brıfıngte málim etti.

Onyń aıtýynsha, naýqan bastalǵaly beri tabıǵat qorǵaý zańnamasynyń 226 tabıǵat qorǵaý zań buzýshylyǵy anyqtalǵan. Sonyń 198 faktisi - balyqty zańsyz aýlaý, 20 - zańsyz tasymaldaý, 6 - fakti - zańsyz satyp alý jáne satý. Ákimshilik jaýapkershilikke 171 adam tartyldy, onyń 39-y sot tártibimen jaýapkershilikke tartyldy.

«Jyl saıyn brakonerlermen kúresý úshin elimizdiń sý qoımalarynda «Bekire-2015» jáne «Ýyldyryq shashý» balyq qorǵaý naýqandary ótkiziledi. Jyl saıyn baǵaly balyq túrleri ýyldyryq shashý maýsymynda quqyq jáne tabıǵat qorǵaý organdary zańsyz balyq aýlaýǵa, ótkizýge, satyp alýǵa jáne olardy zańsyz tasymaldaýǵa jol bermeý úshin birlesip jumys atqarady. 2015 jyldyń basynda aktsııany ótkizý týraly Aýyl sharýashylyǵy, Іshki ister mınıstrlikteriniń jáne Ulttyq qaýipsizdik komıteti tóraǵasynyń birlesken buıryǵy bekitilip, úılestirý shtabynyń quramy, sondaı-aq birlesken is-qımyl jospary aıqyndaldy», - dedi ol.

Aıta keterligi, bekire balyǵyn zańsyz aýlaǵany úshin 2000 aılyq eseptik kórsetkish kóleminde aıyppul nemese 2 jylǵa deıin bas bostandyǵynan aıyrý qarastyrylǵan. Munymen tabıǵatqa iri kólemdi zalal keltirilgen jaǵdaıda nemese balyq aýlaý uıymdasqan toppen júzege asyrylsa, mundaı jaǵdaıda 2 jyldan 5 jylǵa deıin bas bostandyǵynan aıyrý jazasy qoldanylady.