Beketaev Statı isi jaıly: Qazaqstan bárine naqty sıgnal berýi kerek
«Bálkim «Statı isine qanshama qarajat ketip jatyr, odan da sodan tólep qutylǵan durys shyǵar» degen pikir aıtylýy múmkin. Meniń jaýabym – ol durys emes. Sebebi Qazaqstan bul turǵyda bárine naqty sıgnal berýi kerek. Men buryn da ol týraly jıi aıtyp kelemin. Osy isten bas tartyp, negizsiz bereshekti berip qutylý týraly usynys birneshe ret túsken bolatyn. Qazaqstanǵa kelip, ınvestor túrin kórsetip, tıisti ınvestııtsıa salmaı, keıin tipti memleketten qandaı da bir qarajatty alyp qalmaqqa tyryssa – oǵan jol berýge bolmaıdy. Statı arbıtrajda GÓZ qurylysyna 230 mln dollar jumsaǵanyn málimdep, al shyn máninde 180 mln dollardy ofshorǵa shyǵarsa, qazir sol 180 mln dollardy Qazaqstannan óndirgisi kelse, onda meniń jaýabym qarapaıym – bul qarajatty ol ala almaıdy!» - dedi Marat Beketaev OKQ-da ótken baspasóz máslıhatynda.
Ádilet mınıstri Statı isi boıynsha osy jyldyń sáýirinde London soty Qazaqstannyń paıdasyna sheshim shyǵarǵanyn habarlady. Bul sheshim – Ulttyq qordan eshkim eshqandaı soma ala almaıtynyn aıǵaqtaıdy. London sotynyń sheshimi Statı isi boıynsha ǵana emes, keleshektegi barlyq is boıynsha Qazaqstannyń paıdasyna jaraıdy.
«Dál osyndaı sheshimge biz Stokgolmde de ıe boldyq. Atalmysh sheshim de Qazaqstannyń aldaǵy keısteri úshin qyzmet etedi. Biz munymen toqtap qalmaı, oǵan qarsy talaptardy qoıyp jatyrmyz. Nıý-Iorkte Statıdiń oblıgatsonerlerine qatysty shaǵym túsirdik. Keıbir oblıgatsonerler Statımen belsendi túrde seriktesip kelgen. Statıge qarsy shaǵym túsirýdiń ornyna olar Statımen birigip, Qazaqstannan óndirilýi múmkin qarajatty bólip almaq bolǵan. Bul oblıgatsonerler qatelisip qaldy. Biz bul týraly bilip qoıdyq. Olardyń Statımen belsendi túrde serikteskeni, ártúrli protsesterge oǵan kómekteskeni týraly qujattalǵan dálelder bar. Sol sebepti qarama-qarsy talapty biz qoıyp otyrmyz», - dedi ol.
