Beketaev isiniń sotqa tez túsýi kúdiktilerdiń materıalmen tanysýyna baılanysty – Antıkor

ASTANA. KAZINFORM — Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov burynǵy Ádilet mınıstri Marat Beketaevtyń isi boıynsha túsinik berdi.

— Qazirgi tańda qylmystyq is boıynsha tergeý aıaqtaldy, endi is materıaldarymen tanysý júrip jatyr. Tanysýdyń qaı ýaqytta aıaqtalatyny kúdiktilerdiń ózderine baılanysty. Іs materıaldarymen tanysý aıaqtalǵannan keıin is sotqa jiberiledi, — dedi Danııar Bıgaıdarov agenttikte ótken baspasóz máslıhaty barysynda.

Aıta ketsek, eks-mınıstr Marat Beketaevke qatysty isti tergeý byltyr kúzde aıaqtalyp, materıaldarmen tanysý bastalǵan edi. 

Eske sala keteıik, burynǵy Ádilet mınıstri 2023 jyly qazanda laýazymdyq ókilettigin asyra paıdalandy degen kúdikpen ustaldy. 

Antıkordyń málimetinshe, ol talap etilmeıtin qyzmetterdi kórsetýge jyl saıynǵy kelisimsharttar jasaý arqyly úlestes kompanııanyń múddesin qoldaǵan. Eks-sheneýnikti qamaýda ustaý merzimi birneshe ret uzartyldy. Sońǵy ret bıyl 21 mamyrda 2024 jylǵy 21 maýsymǵa deıin qamaý sanktsııalandy.