Beketaev ınvestıtsııa tartýda Qazaqstannyń Eýrazııa aýqymyndaǵy artyqshylyǵyn atady
«Investıtsııalar búgin qajet. Bıznes úshin qajetti senimdilikti aǵylshyn quqyǵy, aǵylshyn tili jáne aǵylshyn soty beredi. Qazaqstanǵa ınvestıtsııalar ǵana emes, ınvestıtsııalarmen qosa jańa tehnologııalar qajet. Sondyqtan zııatkerlik menshikti qorǵaý boıynsha Úkimet birizdi saıasat júrgizedi. Qarjy ortalyǵy aýmaǵynda zııatkerlik menshikti halyqaralyq tirkeý boıynsha yńǵaıly servıs qamtamasyz etiledi», - deıdi Marat Beketaev.
Mınıstrdiń aıtýynsha, Qazaqstanda ınvestorlardyń jumysyn qamtamasyz etýge qabiletti adamı kapıtal qalyptasatyn bolady. Aǵylshyn tilin erkin meńgergen jáne úzdik álemdik ýnıversıtetterde bilim alǵan halyqaralyq deńgeıdegi zańgerler qazirdiń ózinde daıar.
«Sot ádildigin nyǵaıtý boıynsha júrgizilip jatqan jumystar halyqaralyq reıtıngterde kórinis tabady. Halyqaralyq quqyq ústemdigi ındeksinde Qazaqstan 7 jyl ishinde 10 tarmaqqa ósim kórsetip, 126 eldiń arasynda 65-shi orynda tur. Árıne, bul joǵary kórsetkish emes, biraq ınvestıtsııa úshin jahandyq básekelestik jaǵdaıynda aǵylshyn quqyǵy men sheteldik tóreshiler - bul bizdiń Eýrazııalyq óńirdegi básekeli artyqshylyǵymyz. Álemdik bıznestiń 80 paıyzy aǵylshyn quqyǵyn tańdaıdy. Osy sebepten aǵylshyn quqyǵyna negizdelgen Gonkong jáne Dýbaı sııaqty qarjy ortalyqtary óz elderiniń ekonomıkalaryna iri ınvestıtsııalardy tabysty tartady. Investorlar Qazaqstannyń bıznes úshin turaqty jáne jaıly jaǵdaılardy qamtamasyz etetin senimdi seriktes ekenin sezinýi tıis», - deıdi mınıstr.
Eske sala ketsek, buǵan deıin Premer-Mınıstr Asqar Mamınnyń tóraǵalyǵymen elimizde Investıtsııalar tartý jónindegi úılestirý keńesi qurylǵanyn habarlaǵan edik.
