Bekemkúl Batyrbekqyzynyń «Jasa, Qazaqstan» atty avtorlyq keshi ótti
ASTANA. 31 naýryz. QazAqparat/Aınur Kenebaeva/ - Qazaqstan Respýblıkasy Táýelsizdiginiń 20 jyldyq mereıtoıyna oraı búgin QR Ulttyq akademııalyq kitaphanasynda belgili aqyn, Qazaqstan Jýrnalıster odaǵy jáne Halyqaralyq jazýshylar odaǵynyń múshesi Bekemkúl Batyrbekqyzynyń «Jasa, Qazaqstan» atty ádebı-jyr keshi bolyp ótti.
Aıta ketelik, Bekemkúl Batyrbekqyzy - óleńderi sazgerler arasynda baǵalanyp, ánge aınalǵan búgingi aqyndardyń shoqtyǵy bıik ókilderiniń biri. Bekemkúl Batyrbekqyzynyń «Qazyǵurt qyzǵaldaǵy», «Aq sezim», «Ómir órnekteri», «Nur shapaǵat», «Júrek jylýy» atty jyr jınaqtary jaryqqa shyqqan.
Aqynnyń óleńine jazylǵan M.Omarovtyń oryndaýyndaǵy «Túrkııa-Qazaqstan» áni tyńdarman júregine jol taýyp, Túkııa jerinde aıtylyp júr. Áýenin Keńes Dúısekeev jazǵan «Egemen elim-aı» áni otandyq án súıer qaýym arasynda keńinen taralǵan.
«Eńseli, egemendi eldiń búgingi tarıhy, syndarly jyldardyń ishinde halqymyz jetken jetistikteri, qazirgi qazaq qoǵamynyń jańasha kelbeti qaı aqyndy bolsa da tebirentpeı, tolǵantpaı qoımaıdy, sondyqtan da meniń shyǵarmashylyǵyma arqaý bolǵan negizgi taqyryp týǵan el, týyp- ósken jer», - dedi Bekemkúl Batyrbekqyzy jýrnalısterge bergen suhbatynda.
Shara barysynda aqynnyń ómirbaıany, shyǵarmashylyq qyzmeti jóninde keń kólemdi maǵlumat berilip, jyr súıer qaýym avtor týyndylarymen shaǵyn kitap kórmesi arqyly tereńirek tanysty.
