Bekbolat Tileýxan qarjy pıramıdasynyń qyzmetin baqylaýǵa alýdy surady
ASTANA. QazAqparat - Májilis depýtaty Bekbolat Tileýxan palatanyń plenarlyq otyrysynda QR Bas prokýrory Jaqyp Asanovqa joldaǵan depýtattyq saýalynda Questra World qarjy pıramıdasynyń qyzmetin baqylaýǵa alýdy surady, dep xabarlaıdy QazAqparat.
«Qazaqstannyń Bas prokýrory Jaqyp Asanovqa baǵyttalǵan meniń depýtattyq saýalyma mynadaı jaǵdaı sebep bolyp otyr. Jalpy, saýat degen, bilim degen nárse bar. Biz álem xalyqtarynyń saýattylyq reıtıngisinde 11-orynda turǵan el ekenbiz. Shúkir, bizdiń 99,6 paıyz xalqymyz árip tanıdy. Al bilimdi dep aıta alamyz ba?! Mysaly, qarjylyq bilim turǵysynan. Joq, aıta almaımyz. Sebebi jyl saıyn shyǵatyn qarjylyq pıramıdalarǵa bar tapqanyn salyp, odan opyq jep, aqshasy kúıip, ınsýlt alyp, nesıesin jaba almaı, aǵaıynmen keıisip jatqandar óte kóp-aq. Myna saılaýshylarymyzdyń tarapynan qoıylyp jatqan talap osyny jetkizýdi amanattap, tapsyrdy, buny aıtpasymyzǵa bolmady. Bıyl Questra World deıtin qarjylyq kompanııanyń daqpyrty júrip tur. Ańqaý qoǵam olarlyń sen ınvestorsyń degenine senip, jıǵan bar aqshasyn soǵan salyp jatyr. Kólik alýǵa, úı alýǵa, bıznes ashýǵa dep jınaǵan qordaǵy barlyq aqshasyn osy kompanııanyń shotyna salady da, odan az ýaqytqa paıda kórem dep aldanyp otyr jáne aldanǵaly jatyr», - dedi depýtat.
Onyń sózinshe, osy Questra taqylettes Qazaqstandaǵy kompanııanyń orta deńgeıli menedjeriniń astyna kelip qosylǵandardyń ózi 12 mıllıon dollar jınap beripti.
«Tolyq aqshanyń kólemin bile almaımyz, qısaby joq onda. Endi osy Questra sııaqty kompanııalar ózderin Ispanııada ornalasqanyn aıtqanmen, negizgi meken-jáıy Vırgın araldary sekildi offshorlarda ornalasqan. Aıtaıyn degenim: xalyqtyń aqshasy shetel asyp, izim-ǵaıym joǵalyp jatyr. Oǵan kim jaýap beredi. Onsyz da daǵdarys bolyp jatqanda azamattardyń óz qolymen aqshasyn berip jatyr. Bul kompanııalardyń bári zańsyz. Qazaqstanda bir tıyn salyq tólemeıdi. Sheteldikter bizge aqshany bermeıdi, tek aqshany bizden alyp ketip jatyr», - dep qynjyldy B. Tileýxan.
Depýtat, kúmándi sheteldik qarjylyq kompanııalardyń qyzmetin tezirek baqylaýǵa alyp, ony toqtatý jaǵyn usyndy.
«Olar paıdany tabasyzdar tek aqshańdy ákelseń boldy dedi de, mıllıardtaǵan teńgeni xalyqtan jınap aldy jáne jabylyp qaldy. Solardyń sońynan tergeý júrgizgen bireý bar ma? Bar bolsa, nege ony áshkeresin shyǵarmaımyz. Dál osy sátte Questra-ǵa aqsha salý úshin kredıt alyp, lombardqa altynyn ótkizip, kóligin satyp jatqan adamdar kóp. Áne-mine degenshe Questra-myz da jabylyp qalady, túsinikti, úrlengen shar sekildi ol jarylady. Aqyrynda ınsýlt alǵan, ınfarkt alǵan aǵaıyn qalady. Sosyn kim jaman?! Úkimet jaman bolady. Sebebi bundaı qarjylyq kompanııalardy tekserý kerek edi, toqtatý kerek edi, xalyqty qarjylyq saýattandyrý kerek edi, deıdi» - dedi depýtat.
