Bekbolat Tileýhan: Prezıdent aıtqandaı tildi reformalaýda jeńiltektikke jol bermeý kerek

NUR-SULTAN. QazAqparat - Ortalyq kommýnıkatsııalar qyzmetinde ótken brıfıngte Ulttyq qoǵamdyq senim keńesiniń múshesi Bekbolat Tileýhan búgin elordada ótken Ulttyq keńes otyrysynda talqylanǵan máselelerge qatysty pikir bildirdi, dep habarlaıdy QazAqparat tilshisi.

«Ulttyq keńes otyrysynda Prezıdent kóp kózǵalǵan máseleniń biri - latyn álipbıine ótý boldy. Ol »Eshqashan asyǵýǵa bolmaıdy. Bul qaýipti nárse« dedi. Ǵalymdardyń pikirine súıenip, saraptama jasaý kerektigin aıtty», - deıdi Bekbolat Tileýhanov.

Sondaı-aq, ol Prezıdent Qasym-Jomart Toqaev qazaq tilin reformalaý kerektigin aıtqanyna toqtalyp ótti.

«Aıtyp ótken taǵy bir mańyzdy másele - qazaq tiline reforma jasaý. Bul másele boıynsha ǵalymdar tarapynan ekiudaı pikir qalyptasýy múmkin. Mysaly, túrik tiline reforma jasaý arqyly jalpy tilderdi ıgerý jaǵyn qarastyrǵan. Shyǵarmashylyq til - bir basqa, kúndelikti qoldanatyn aýyzeki til - bir basqa. Tildi saqtaý tek zańmen iske asatyn nárse emes qoı. Bul qadamnyń mańyzdylyǵyn estigen boıda túsine qoımaýymyz múmkin, biraq túbegeıli bir nárse iske asatyn bolsa tildiń kókjıegi ashylady. Prezıdentimiz aıtqandaı, bul - jeńil-jalpy qaraıtyn nárse emes. Bul jerde ǵalymdardyń eńbegi, qoǵam tarapynan kómek kerek. Bul jerde reforma qajet bolyp tur. Bul - ult taǵdyryna qatysty mańyzdy qadam»,- deıdi ol.

Eske sala ketsek, 6 qyrkúıek kúni Ulttyq keńestiń alǵashqy otyrysynda memlekettik til mártebesi týraly zań qabyldaý týraly usynys aıtqan bolatyn.