Bekbolat Tileýhan: Meniń balam álippemen qoshtasa almaı keledi
ASTANA. QazAqparat - Búgin Májiliste orta bilim máselelerine arnalǵan otyrysta Bekbolat Tileýhan QR Bilim jáne ǵylym mınıstri Erlan Saǵadıevti oqýlyq máselesin talqylaý úshin Parlamentke shaqyrdy, dep habarlaıdy QazAqparat.
«Balalardyń taqyrybyna burylǵan kezde, ult pen memleket úshin budan mańyzdy is joq. Shyn máninde, álippedegi qarip tanýdy qabiletti bala 22-24 kúnde úırenedi, qabileti joq degen bala ary ketkende 60 kúnde meńgeredi. Al meniń birinshi synypta oqıtyn balam búgingi 26 aqpanda áli «ıÝ» árpinde júr. 7 aı oqyp jatqanymen, áripterdi tolyq tanymaǵan. Bul qalaı? Onyń ústine balada eshqandaı eńsesin kóterip, oınaıtyn múmkindik joq. Tańerteń saǵat 8:30-da ketkennen, úıge saǵat 17:00 kezinde keledi. Ne alyp jatqan bilim joq, ne bala bolyp júgirip, demala almaıdy. Sonymen qatar kúresine, dombyrasyna jáne basqa da úıirmelerine bara almaıdy», - dep toqtaldy depýtat QR BǴM ókilderine qaratyp aıtqan sózinde.
Osy oraıda B. Tileýhan mektep baǵdarlamasy balalarǵa qıyn túsip jatqanyn atap ótti.
«Byltyr osy máseleni Parlament qabyrǵasynda aıtqanbyz. Sol kezde mınıstrden «oqýlyqtarǵa tikeleı kim jaýap beredi?» dep suraǵanda, ol óz kezeginde mınıstrlik jaýapty ekenin aıtqan edi. Bir álippeni 7 aı boıy kemirip jatyr jáne ony áli tolyq ótken joq», - deıdi B.Tileýhan.
Óz kezeginde Bilim jáne ǵylym vıtse-mınıstri Ashat Aımaǵambetov óziniń de balasy jańartylǵan baǵdarlama boıynsha bilim alyp jatqanyn sóz etti.
«Meniń balam qazir ekinshi synypta oqıdy. Birinshi synypta sol álippeni oqydy. Bala oqyǵanda ata-ana retinde óziń de sol kitapty oqısyń. Sondyqtan aldyńǵy jyly álippeni men de birge óttim. Jańartylǵan bilim mazmuny boıynsha balam atalǵan baǵdarlamamen tálim alyp jatyr. Osy oraıda sonshalyqty qıyn boldy, búgin oqı almaıdy dep aıta almaımyn», - dedi A. Aımaǵambetov.
Bilim mınıstri orynbasarynyń sózine qaraǵanda, balalardyń naýryzǵa deıin álippeni oqyp jatqany tıptik baǵdarlamaǵa baılanysty.
Bul jerde Bekbolat Tileýhan vıtse-mınıstrdiń sózin bólip: «Meniń balam teńerteńnen keshke deıin mektepte. Nege bizdiń balalarymyz áke-sheshesiniń baýyrynda bolmaıdy? Balalar ata-ananyń jylýyn kórýi kerek qoı. Keńestik kezeńde 10 jeltoqsanda «álippemen qoshtasý» bolatyn. 1973 jyldyń jeltoqsanynda Bekbolat Tileýhan álippemen qoshtasqan. Al naýryz taıap qalsa da, meniń balam áli «ıÝ» árpinde júr. Endeshe tıptik baǵdarlamańyz qate. Tıptik baǵdarlama ózgermeıtin qasıetti kitap emes. Sondyqtan ony ózgerteıik», -dedi.
Osy oraıda depýtat bul máselege qatysty QR Bilim jáne ǵylym mınıstri Erlan Saǵadıevtiń Májiliske kelýi kerektigin atap ótti.
«Osy máselege mınıstrdiń ózi kelsin. Parlamenttiń qabyrǵasynda talqylaıyq. Talqylaýǵa tájirıbe júzinde jumys istep júrgen muǵalimderdi, ıaǵnı bilimniń qamyn oılaǵan pedagogtardy shaqyraıyn», - dep túıindedi sózin Bekbolat Tileýhan.
Esterińizge sala keteıik, 2017 jyldyń aqpanyn Májilistegi Úkimet saǵatynda oqýlyqtardaǵy kemshilikterdi talqylaý máselesi boıynsha depýtat Bekbolat Tileýhan QR Bilim jáne ǵylym mınıstri Erlan Saǵadıevti jekpe-jekke shaqyrǵan bolatyn.
