Bekbolat Tileýhan Kóshpendiler oıynyndaǵy kókparǵa qatysty túsinik berdi
ASTANA. QazAqparat - QR Ulttyq sport qaýymdastyǵynyń prezıdenti Bekbolat Tileýhan búgin Astanada Dúnıejúzilik kóshpendiler oıyndarynyń qorytyndysyna oraı baspasóz máslıhatyn ótkizdi, dep habarlaıdy QazAqparat tilshisi.
Jıyn barysynda Bekbolat Tileýhan sońǵy 2-3 kúnde áleýmettik jelilerde talqylanyp jatqan kókparshylarǵa qatysty máselege baılanysty suraqqa jaýap berdi.
«Bizdiń eresekter quramasy barǵan joq (Dúnıejúzilik kóshpendiler oıyndaryna - avt.) Aldyńǵy eresekter quramasy barǵan kezde bizdiń kókparshylar ekinshi oryn alyp qalǵan. Únemi utylýda boldy. Sondyqtan, jalpy kókparshylarmen, osy saladaǵy mamandarmen aqyldastyq. Bul Azııa nemese Álem chempıonaty emes, bar bolǵany festıval ǵoı. Biz bul dodaǵa jastar komandasyn saldyq. Jastar da dodaǵa túsip, sol synnan ótýi kerek. Qyrǵyzstanda oınaǵan Qazaqstannyń jastar komandasy. Maqsatymyz oryndaldy. Bardy, oınady, óte jaqsy dárejede óner kórsetti dep oılaımyn», - dedi Bekbolat Tileýhan.
QR Ulttyq sport qaýymdastyǵynyń prezıdenti áleýmettik jelidegi pikirlerge qatysty oıyn jetkizdi.
«Sport bolǵannan keıin bireý jeńedi, bireý jeńiledi. Eresekterdi jibersek, jeńip turǵanymyz anyq. Endi jastarda kirispeı me!? Bizdiń jetekshi retinde aldymyzǵa qoıyp otyrǵan negizgi maqsat bar - bul ádildik. Qazaqstannyń jerine kep oınaǵanda, aýdaryspaǵyńyz bolsyn, kókparyńyz bolsyn - ádildikten bir santımetr taıǵan jeri joq. Óıtkeni, qalyptasý kezeńindegi oıyn bolǵannan keıin bastalmaı jatyp, ádiletsizdikke baratyn bolsaq, berekesi ketip qalady», - deıdi ol.
Bekbolat Tileýhan sonymen qatar, «Ulttyq sportqa qanshama aqsha bólindi» degen suraqqa jaýap berdi.
«Ashyǵyn aıtaıyn, osy ýaqytqa deıin 200 mıllıon teńge bólindi. 40 paıyzǵa jýyǵy júlde qoryna ketti. Ony bilý qıyn emes. Jeńis tuǵyrynda turǵan sportshylar qolyna sertıfıkatty ustap tur ǵoı. Sonda sanap alsańyzdar, sol somanyń 30-40 paıyzy shyǵady», - deı kele Bekbolat Tileýhan osy ýaqytqa deıin ulttyq sport túrlerin órkendetýge úles qosyp júrgen azamattarǵa alǵysyn bildirdi.
Aıta ketsek, osyǵan deıin Qyrǵyz Respýblıkasynda ótken ІІІ Dúnıejúzilik kóshpendiler oıyndarynda Qazaqstan quramasy jalpykomandalyq esepte ekinshi oryn alǵan bolatyn. Sondaı-aq, qazaq kókparshylary atalmysh oıyndarda ózbek sportshylarynan jeńilip, qola medaldy mise tutqan edi.
