Bekbolat Tileýhan bilim mınıstrine: Orta bilimdegi problemalardy sheshseń, hatshyń bolýǵa daıynmyn

NUR-SULTAN. QazAqparat – Orta bilim salasyndaǵy problemalar sheshilse, Bilim mınıstriniń kómekshisi bolýǵa daıynmyn. Parlament Májilisindegi bilim máselesine arnalǵan Úkimet saǵatynda depýtat Bekbolat Tileýhan osylaı máim etti, dep habarlaıdy QazAqparat tilshisi.

«Bilim salasynan, onyń ishinde orta bilimnen mańyzdy máseleni kórip turǵanym joq. Jasyratyny joq orta bilimdegi soraqylyq, oqýlyq máselesi qoǵamnyń tıtyǵyna tıip bitti. Bala túgili ata-anasy túsinbeıtin taqyryp, sheshilmeıtin esep qoǵam tarapynan qandaı synǵa ushyrasa da miz baqqan júıe joq. Mazaq pa, enjarlyq pa, ony túsinbedik. Bizde Konstıtýtsııa boıynsha jalpy negizi bilim alý aqysyz, biraq jaqsylap oqytý úshin repetıtor jaldaýǵa májbúr bolamyz», - dedi Bekbolat Tileýhan.

Sonymen qatar depýtat salada bilikti maman daıarlaý problemalaryna da toqtaldy.

«Búgingi bilim júıesin qarap otyrsaq, qurdymǵa bettep bara jatyr. Qaı jaǵynan kelsek te, syn kótermeıdi. Sondyqtan júıeni túbegeıli qaıta qaraý kerek. Oqýlyq shyǵarý júıesin, muǵalimder daıarlaýdy qaıta qaraǵan jón. Ashat, jaqsy jigitsiń, azamatsyń. Endi osy máselelerge qajyr-qaıratpen kiriseıikshi. Tap osy másele sheshiletin bolsa, depýtattyq mandatymdy berip, kómekshi ári hatshy bolyp barýǵa daıynmyn», - dedi B. Tileýhan QR Bilim jáne ǵylym mınıstri Ashat Aımaǵambetovke qarata aıtqan sózinde.