Bekbolat Tileýhan azamattyq ala almaı júrgen qandastarymyzdyń jaǵdaıyn aıtty
«Jasyratyny joq Qytaıdan, Ózbekstannan, alys-jaqyn shetelden Qazaqstanǵa azamattyq alamyz dep tarıhı otanyna kelip, bosyp júrgen halyqtyń sany kóp. Osynda qujatyn retteı almaı sandalyp júrgen azamattardy elimizde zańsyz júrsiń dep aıyptap, sottyń sheshimimen shyǵaryp jatqanymyz da ótirik emes. Bizdiń atymyzǵa bala-shaǵasy, otbasy músheleri jan-jaqqa shashylyp ketken azamattardan aryz-shaǵymdar kóptep túsýde. Qandaı da bir úkimettik jeńildiktermen qujatyn rettep berýdi surap otyrǵan el kóp-aq», - dedi depýtat.
Máselen, onyń aıtýynsha, Qaraqalpaqstannan Ereımentaýǵa 2007 jyly kóship kelgennen beri búgingi kúnge deıin Úkimetten beriletin kvotasyn da, qujatyn da retteı almaı júrgen adamdar áli de mol.
«Jasyratyny joq, kóbinese keletin adamdardyń barlyǵy birdeı asa saýatty emes. Dıqandar, malshylar keledi. Mysal úshin Qytaıdan kelgen 24 jastaǵy jigit tarıhı otanynyń azamaty bolamyn degen nıetpen Almaty oblysyna qujat tapsyrdy. Yqtııar hatyn kútip júrgende úsh aı tolmaı elde zańsyz júrsiń dep aıyptap, ustap, eline qaıtsyn degen sottyń sheshimi shyqty. Endi joq aǵaıyn, sybyrlaǵandy qudaı estimeı me. Qytaı bıliginiń búgingi saıasaty qazaqqa asa qolaıly bolyp otyrǵan joq. Ol jerde ári-sári kúıge, taǵdyrdyń talqysyna túsip qalǵan qandastarymyz qanshama. Ondaı nárseni júregimizdiń túpkirimen jete túsinbesek te bolmaıdy. Jalpy kómektesýden góri kedergi jasaý op-ońaı», - dedi Bekbolat Tileýhan.
Onyń atap ótýinshe, bólinip-jarylǵan otbasylardyń qaıta qosylýyna yqpal jasaýǵa negiz bolatyn halyqaralyq ratıfıkatsııalar, komıssııalar, Helsınkı, Vena, Jeneva konventsııalary bar.
«Soǵan súıene otyryp bir qaıran jasaýǵa bolmaı ma? Qandastarymyz bosyp ketti ǵoı, shyn máninde qınalyp jatyr», - dedi ol.