Bekbolat Tileýhan álemdik mergen Batkerıl Mıchır qazaqtarǵa ne úshin tańdanǵanyn aıtty
«Atqaryp jatqan sharalardyń aıasynda óshkenimizdi jańǵyrtyp, ólgenimizdi tiriltý maqsaty jatyr. Bizde biraz dúnıeniń aty bolǵanymen, zaty joǵalyp ketken. Atap aıtqanda, at ústinen sadaq tartý jaıynda turǵyndar bilgenimen, onymen aınalysyp júrgender joqtyń qasy. Basqa elderde saqtalǵanymen, qazaqta saqtalmaǵany óte ókinishti. Sondyqtan biraz mamandarmen aqyldasa kele, osy baǵytty qalpyna keltirýdiń jan-jaqty múmkindikterin qarastyrdyq. Sodan, 2014 jyly at ústinen sadaq atatyn tanymal mońǵol azamaty Batkerıl Mıchırdi shaqyrttyq. Sol azamat bizge oq jonýdy úıretip, at ústinen sadaq tartý turǵysynda kómektesti. Jalpy, sol kezde at ústinde sadaq ustamaǵan jigitter aınalasy eki aptanyń ishinde álemdik deńgeıde sadaqpen atyp júrgen B. Mıchırdiń kórsetkishine jetti. Osyny kórgen mońǵol bapkerimiz tańdanǵannan, kózin jumyp, aýzyn ashyp ketti. Sóıtse, bul bizdiń qanymyzda bar ekeni aıqyn kórinip turdy. Genetıkalyq jady, ulttyq kod deımiz ǵoı, ıaǵnı bar nárseni jańǵyrtý. Úırengende osynyń barlyǵy uzaq jattyǵýmen keledi, biraq qazaq jigitteri bir-eki kórsetkende birden nátıje kórsete bastady»,-dedi B. Tileýhan Ortalyq kommýnıkatsııalar qyzmetinde Astanada ótetin «Altyn jebe» halyqaralyq týrnırge arnalǵan baspasóz máslıhatynda.
Onyń sózine qaraǵanda, búginde ulttyq sportqa halyqtyń qyzyǵýshylyǵy óte jaqsy bolyp otyr. Degenmen de bul baǵytta áli nasıhattaý sharalary qajettilik etýde.
Belgili bolǵandaı, «EKSPO-2017» halyqaralyq kórmesi aıasyndaǵy taǵy bir halyqaralyq básekeniń tý kóterer mezgili taıaý qaldy. Tamyzdyń 12-13 kúnderi Astanadaǵy «Qazanat» atshabarynda ótetin Jamby atýdan «Altyn jebe» atty І halyqaralyq týrnırge álemniń jıyrmaǵa jýyq memleketiniń mergenderi keledi dep kútilýde.
Bizdiń elden «Altyn jebede» bes sportshy baq synamaq. Qazaqstannyń «Jamby atý» eresekter qurama komandasynyń kapıtany, Jamby atýdan Qazaqstan Respýblıkasy chempıonatynyń birneshe dúrkin júldegeri, halyqaralyq mergender saıysyna qatysýshy, 2016 jylǵy «Uly dala oıyndary» festıvaliniń jeńimpazy, «Altyn tuǵyr» ıegeri atanǵan Eldos Badashev jáne elishilik chempıonatta top jaryp júrgen sańlaqtarymyz Sarybaı Aıtbek, Aıkóz Eralhan, Abzal Týlybekov, Bekqalı Úzdenbaev el namysyn qorǵaıdy.
Qazirgi kezde birqatar elden qatysýshylar kelip jatyr. Osy jarysqa tek Japonııadan 13 adam keledi dep kútilýde.
Qazaq elinde tuńǵysh uıymdastyrylǵan «Altyn jebe» týrnıriniń júlde qory da qomaqty. Bes orynǵa deıin báıge bar. Bas júlde - 5 myń dollar. Ekinshi oryn - 3 myń dollar. Úshinshi - 2 myń dollar. Tórtinshi oryn - 1 myń dollar. Besinshi oryn - 500 dollar.
Sharany QR Mádenıet jáne sport mınıstrligi, «Ulttyq sport túrleri qaýymdastyǵy» jáne «Túrki halyqtarynyń dástúrli sport túrleri qaýymdastyǵy» uıymdastyryp otyr.
